काठमाडौं, २८ साउन-गत ३१ जेठमा संघीय संसदले संशोधन गरेको नेपालको नयाँ नक्सालाई संयुक्त राष्ट्र संघमा पठाईने भएको छ । भूमि व्यवस्थामन्त्री पद्मा अर्यालले त्यसका लागि बिहीबार औपचारिक रुपमा पत्रमा हस्ताक्षर गरेपछि संशोधित नक्साको जानकारी राष्ट्र संघमा पठाइने भएको हो ।

‘हालै संशोधन भएको नेपालको नक्साका बारेमा राष्ट्र संघलाई जानकारी गराउँदैछौं,’ मन्त्री अर्यालले भनिन्, ‘त्यसका लागि भोलि मन्त्रालयले पत्र तयार पारेपछि हस्ताक्षर गरेर परराष्ट्र मन्त्रालयलाई पठाउँछु ।’

उनका अनुसार पराराष्ट्र मन्त्रालय मार्फत नेपाल सरकारले संशोधित नक्साका बारेमा राष्ट्रसंघलाई औपचारिक रुपमा पत्राचार गर्नेछ । गत ३१ जेठमा संघीय संसदले लिम्पियाधुरा, लिपुलेक र कालापानीको नेपाली भूमि समेटेर पूर्ववतः नेपालको राजनीतिक नक्सामा संशोधन गरेको थियो ।

नेपालको संसदवाट सर्वसम्मत रुपमा संसोधन भएको झन्डै ३ महिनापछि त्यसको जानकारी राष्ट्र संघलाई पठाउन लागिएको हो । त्यसका लागि भूमि व्यवस्था मन्त्रालयले आवाश्यक तयारी पूरा गरिसकेकाले बिहीबार औपचारिक रुपमा पत्राचार गर्न लागेको हो ।