विराटनगर, साउन २५–सुनसरीमा तोकिएको निषेधित क्षेत्रको अवधि थप ६ दिन बढाइएको छ । २१ गते जारी निषेधित क्षेत्रको समयावधि सोमबार राती सकिनेमा जिल्ला प्रशासन कार्यालय सुनसरीले ६ दिन थप गर्दै अब ३२ गते सम्म कायम रहने भएको हो ।

जिल्ला प्रशासन कार्यालय सुनसरीले जिल्लालाई साउन ३२ गते राती सम्म निषेधित क्षेत्र कायम राख्ने निर्णय गरेको हो । स्थानीय तहहरुमा स्वाब संकलनको दायरा बढाउँदै जाँदा संक्रमितको संख्या समेत थपिदै गएकाले जिल्लामा लागु गरिएको निषेधित क्षेत्र थप ६ दिन कायम राख्ने प्रशासनले निर्णय गरेको सुनसरीका प्रमुख जिल्ला अधिकारी फणिन्द्रमणि पोखरेलले बताए ।

भीड नियन्त्रणसँगै कोरोना भाइरसको बढ्दो संक्रमण रोक्नकालागि निषेधित क्षेत्रको अवधि बढाउने निर्णय गरिएको उनले बताए । साउन २० गते ढुवानी बाहेकका सवारी रोक्दै अत्यावश्यक बजार पसल सीमित समय खोल्ने निर्णय गरेको प्रशासनले भोलिपल्ट २१ गते राती १२ बजेदेखि लागु हुने गरी जिल्लालाई निषेधित क्षेत्र घोषणा गरेको थियो ।

उनका अनुसार निषेधित क्षेत्र घोषणा गरिएको अवधिभर सरकारी तथा सार्बजनिक संस्था र अत्यावश्यक सेवाका कर्मचारीले कार्यालयको कामका लागि हिँडडुल गर्न पाउने छन् ।

त्यसैगरी सरकारी नम्बर प्लेट र कर्मचारीले प्रयोग गर्ने सवारीका साथै अत्यावश्यक सेवा, ढुवानी र निर्माण सामाग्री बोकेका सवारी बाहेक सवै प्रकारका सवारी साधानको अवागमन बन्द गरिएको प्रमुख जिल्ला अधिकारी बन्द गर्ने जिल्ला अधिकारी पोखरेलले बताए । उनका अनसार औद्योगिक क्षेत्रको हकमा स्वास्थ्य प्रोटोकल पालना गरि उद्योग सञ्चालन, कच्चा पदार्थ आयात र उत्पादित बस्तु बजारमा लैजान बाधा गरिएको छैन ।