विराटनगर, साउन १९–विराटनगरस्थित विराट नर्सिङ्ग होम (विराटनगर अस्पताल) शिल भएको दुई सातापछि सोमबारबाट सञ्चालनमा आएको छ । अस्पतालका सञ्चालकसमेत रहेका डा. ज्ञानेन्द्रमानसिंह कार्कीमा कोरोना संक्रमण पुष्टि भएपछि विराटनगर महानगरपालिकाले गत साउन ८ गते अस्पताल शिल गरेको थियो ।

दुई सातासम्म अस्पताल सेनिटाइज गरेपछि सञ्चालनमा ल्याइएको हो । अस्पतालमा कार्यरत स्वास्थ्यकर्मी र कर्मचारीहरूको स्वाब संकलन गरि पीसिआर प्रविधिबाट परीक्षण गरेपछि अस्पताललाई पूर्णरुपमा सेनिटाइज गरेर सञ्चालनमा ल्याएको अस्पतालका प्रशासन प्रमुख पदम विनाडीले जानकारी दिए ।

उनले अस्पताल शिल गरेपछि सो अस्पतालमा कार्यरत सम्पूर्ण कर्मचारीको स्बाव संकलन गरिएको र रिपोर्ट पोजेटिभ आएकालाई कोभिड अस्पतालमा तथा नेगेटिभ आएका स्वास्थ्यकर्मी एवम कर्मचारी अस्पतालमा रहेको बताए ।

अस्पताल पूर्णरुपमा सञ्चालन गर्न आफूहरु तयार भएपनि नेपाल चिकित्सक संघ कोशी शाखाले जारी गरेको विज्ञप्तिलाई सम्मान गर्दै अर्काे सूचना जारी नभएसम्म आकस्मिक सेवा मात्र सञ्चालनमा ल्याइएको विनाडीले बताए ।

सो अस्पतालका सञ्चालक डा. कार्कीको संघिय राजधानी काठमाडौंमा प्लाज्मा थेरापि विधिबार उपचार भएको छ । हाल उनि उपचाररत रहेको र स्वास्थ्य अवस्था सामान्य बन्दै गएको जनाइएको छ ।