काठमाडौं, ३० असार-सत्तारुढ नेपाल कम्य’निस्ट पार्टी (नेकपा) का दुई अध्यक्षबीच मंगलबार भएको छलफल निष्कर्षविहीन भएको छ । पार्टीभित्रको आन्तरिक विवाद समाधानको प्रयासस्वरुप अध्यक्ष तथा प्रधानमन्त्री केपी शर्मा ओली र पुष्पकमल दाहाल (प्रचण्ड) बीच मंगलबार छलफल भएको थियो ।

यसअघि पार्टी कामको सिलसिलामा अध्यक्ष पुष्पकमल दाहाल राजधानीबाहिर भएका कारण ५ दिनपछि दुई अध्यक्षको वार्ता भएको हो । प्रधानमन्त्री निवास बालुवाटारमा करिब १ घन्टा भएको छलफल कुनै निष्कर्षमा पुग्न नसकेको स्रोतले जनाएको छ । नेकपाको आन्तरिक विवाद चर्किएपछि स्थायी कमिटी बैठक २ साउनसम्मका लागि स्थगित भएको छ ।

बैठक रोकेर पार्टीभित्र सहमति जुटाउने प्रयास गरिए पनि नेताहरूबीच अझै सहमति जुट्न नसकेको हो । स्थायी समिति बैठकमा नेताहरूले प्रधानमन्त्री तथा पार्टी अध्यक्ष केपी शर्मा ओलीको राजीनामा माग गरेपछि विवाद चर्किएको हो । ओली भने राजीनामा नदिने पक्षमा छन् ।