काठमाडौं, १९ असार-लिटिल बुद्ध भनेर चिनिएका रामबहादुर बम्जनको मुद्दा अदालतमा दायर भएको छ । सर्लाहीकी एक आफ्नै अनुयायी बलात्कार गरेको अभियोग लागेका बम्बजको मुद्दा शुक्रबार जिल्ला अदालत सर्लाहीमा दायर गरिएको हो ।

उनलाई बलात्कार अभियोगमा १४ वर्ष जेल सजाय माग दाबी गरिएको जिल्ला सरकारी वकिल कार्यालयका न्यायाधिवक्ता केशवप्रसाद गौतमले जानकारी दिए ।

त्यसरी नै बम्जनको सहयोगी जीतबहादुर तामाङ र एक जना अर्का सहयोगीलाई समेत ७–७ वर्ष जेल सजाय माग दाबी गरेर मुद्दा दायर भएको गौतमले बताए ।

४ महिनाअघि सर्लाही अदालतको बलात्कारको अभियोगमा उनलाई पक्राउ पुर्जी जारी गरे पनि प्रहरीले पक्राउ गर्न भने सकेको छैन । उनी फरार रहेको प्रतिवेदन भने प्रहरी अदालतमा पेस गर्नेछ ।

अदालतले प्रहरीलाई लिएको समय अवधिको हद म्याद २१ असारमा सकिँदै छ । बम्जनको सिन्धुली र सिन्धुपाल्चोकको आश्रममा प्रहरीले पटक–पटक छापा मारे पनि पक्राउ गर्न भने सकेको छैन ।