विराटनगर, असार १२-प्रदेश नं. १ मा शुक्रबार १६ जनामा कोरोना संक्रमण पुष्टि भएको छ । प्रदेश १ सामाजिक विकास मन्त्रालयका अनुसार शुक्रबार मोरङको विराटनगरका १ महिला र १ पुरुषमा कोरोना संक्रमण पुष्टि भएको छ ।

त्यसैगरी झापाको दमक नगरपालिकाका १ महिला र २ पुरुष, मेचीनगर नगरपालिकाका १ पुरुष, सुनसरीको कोशी गाउँपालिकामा ३ महिला र ५ पुरुष, देवानगञ्ज गाउँपालिकाका १ महिला र १ पुरुषमा कोरोना संक्रमण पुष्टि भएको सामाजिक विकास मन्त्रालयका प्रवक्ता डा. सुरेस मेहताले जानकारी दिए ।

शुक्रबार पुष्टि भएकासँगै प्रदेश १ मा कुल कोरोना संक्रमितको संख्या ५ सय १९ पुगेको छ । प्रदेश १ को झापा जिल्लामा हालसम्म सवैभन्दा बढी २ सय १५ जनामा कोरोना संक्रमण पुष्टि भएको छ ।

त्यसैगरी, मोरङमा १ सय ३३, सुनसरीमा ८५, धनकुटामा ८, भोजपुरमा ६, खोटाङमा ४, उदयपुरमा ५२, सोलुखुम्बु र ओखलढुंगामा १÷१, संखुवासभा र इलाममा २÷२, तेह्रथुम र पाँचथरमा ३÷३, र ताप्लेजुङमा ४ जनामा कोरोना संक्रमण पुष्टि भएको छ ।

कोरोना जितेर घर फर्किनेको संख्या बृद्धि भएसँगै १ नं. प्रदेश क्रमशः कोरोना मुक्त हुँदै गएको छ । प्रदेशका धनकुटा, भोजपुर, खोटाङ, सोलुखुम्बु, संखुवासभा, तेह्रथुम, इलाम र ताप्लेजुङ जिल्ला कोरोना मुक्त भएको छ । संक्रमित कोरोना जितेर डिस्चार्ज भएसँगै ती जिल्ला कोरोना मुक्त भएका हुन् ।

प्रदेशमा शुक्रबारसम्म कोरोना पुष्टि भएका मध्ये ३ सय ७७ जना कोरोना मुक्त भएर घर फर्किएका छन् । १ नं. प्रदेश अन्तर्गत झापा जिल्लामा संक्रमण पुष्टि भएका मध्ये १ सय ६५, मोरङका ८३, सुनसरी ५६, धनकुटा ८, भोजपुर ६, खोटाङ ४, उदयपुर ४१ सोलुखुम्बु १, संखुवासभा २, तेह्रथुम ३, इलाम २, पाँचथर २ र ताप्लेजुङका ४ जना कोरोना जितेर घर फर्किएको मुख्यमन्त्री तथा मन्त्री परिषदको कार्यालयले जनाएको छ ।

प्रदेश १ मा शुक्रबार पुष्टि भएकासँगै १ सय ४२ जना उपचाररत रहेका छन् । प्रदेश १ मा हालसम्म २१ हजार ६ सय १४ जनाको नमुना संकलन तथा पिसिआर परिक्षण गरिएको छ । २ हजार २ सय ७९ जनाको रिपोर्ट नेगेटिभ आएको मुख्यमन्त्री कार्यालयले जनाएको छ ।