विराटनगर, असार ११-बिहिबार लगातारको अविरल वर्षाका कारण विराटनगर जलमग्न भएको छ । आज बिहानैदेखि लगातार परेको वर्षाले विराटनरका विभिन्न वडाहरु जलमग्न भएका हुन् ।

पानीको सतह बढेपछि विराटनगरको दक्षिणी र पश्चिमी क्षेत्रका केही बस्तीहरु डुबानमा परेका छन् भने बजार क्षेत्रमा पनि पानी जमेको छ । अव्यवस्थित विकास निर्माण र जमेको पानीको निकाश हुन नसक्दा महानगरका विभिन्न स्थान जलमग्न भएको हो ।

सडक जलमग्न र हिलाम्मे भएपछि आवत जावतमा समस्या भएको छ । अव्यवस्थित विकास निर्माणका कारण वर्षाको पानि जमेर दुर्घटनाको खतरासमेत निम्तिएको छ ।

सडकका ठूला खाल्डामा पानी जम्दा मोटरसाइकल, कारलगायत साना सवारी साधनहरु गुडाउनसमेत समस्या भएको छ । सडक किनार र पेटीबाट हिँड्ने पैदलयात्रीसमेत गाडीले हिलो छेप्ने डरले जोगिएर हिँड्नुपरेको छ ।