पोखरा, १० असार-निजी स्वास्थ्य संस्थामा कार्यरत स्वास्थ्यकर्मी तथा कर्मचारीका समस्या श्रम मन्त्रीलाई ध्यानाकर्षण गराइएको छ । नेपाल स्वास्थ्यकर्मी तथा कर्मचारी युनियनका अध्यक्ष चन्द्र थापा नेतृत्वको टोली मंगलबार श्रम मन्त्रालय पुगेर कोभिड-१९ को महामारीमा फ्रन्टलाइनमा बसेर काम गरिरहेका निजी स्वास्थ्य संस्थका स्वास्थ्यकर्मी तथा कर्मचारीले भोग्नु परेका समस्या श्रम रोजगार तथा सामाजिक सुरक्षा मन्त्री रामेश्वर राय यादवलाई ध्यानाकर्षण गराएका हुन् ।

युनियनले आफ्नो ११ औं स्थापना दिवसको अवसर पारेर देशभरका ७ वटै प्रदेशका १ सय १५ निजी स्वास्थ्य संस्थाहरूमा कोभिड-१९ को महामारी र बन्दाबन्दीको समयमा स्वास्थ्य क्षेत्रको वस्तविकता र त्यहाँ कार्यरत कर्मचारीहरुका समस्या अध्ययन गर्न सर्वेक्षण गरेको थियो । सोही अध्ययनको प्रतिवेदन युनियनको टोलीले केही दिन पहिले स्वास्थ्य मन्त्रीलाई मन्त्रालयमा नै पुगेर ध्यानाकर्षण गराएको थियो भने मंगलबार श्रम रोजगार तथा सामाजिक सुरक्षा मन्त्रालय पुगेर श्रम मन्त्री यादबको ध्यानाकर्षण गराएको हो ।

युनियनले गरेको सर्वेक्षणमा कतिपय निजी अस्पतालमा व्यक्तिगत सुरक्षा सामग्री (पिपिई) बिना नै काम गर्न पर्ने बाध्यात्मक अवस्था रहेको, केही अस्पतालमा विगत फागुन महिनादेखि कै पारिश्रमिक नपाएको, कतिपय निजी स्वास्थ्य संस्थामा कार्यरत श्रमिकहरूले समयमा तलब नपाउने, पाए पनि पूरा तलब नपाउने र बेतलबी बिदा बस्नुपर्ने बाध्यताले उनीहरूको दैनिक जीवनयापन झन झन कष्टकर हुँदै गएको, घरभाडा र अत्यावश्यक दैनिक उपभोग्य सामग्रीको जोहो गर्न पनि नसक्ने अवस्था बनेको पाइएको थियो ।

नेपाल स्वास्थ्यकर्मी तथा कर्मचारी युनियनको सर्वेक्षण प्रतिवेदन, अछामको बयलपाटा अस्पतालमा घटेको घटनाको छानबिन गरि दोषिलाई सजाय र पिडिलाइ न्याय, साथै सरकारले निर्देशन गरेको पारिश्रमिक सम्बन्धि निर्णयमा निजी अस्पतालका संचालकले गरेका आनाकानीलगायतका विषयमा नेपाल स्वास्थ्यकर्मी तथा कर्मचारी युनियनले श्रम मन्त्री यादबलाई भेटी ध्यानाकर्षण पत्र बुझाएको हो । लकडाउन अवधीको नेपाल सरकारको निर्णय अनुसारको पारिश्रमिक र प्रोत्साहन भत्ता सबैलाई समान रूपले अविलम्व उपलब्ध गराउन पहल गरिदिन युनियनका अध्यक्ष थापाले श्रम मन्त्री यादवलाई अनुरोध गरेका छन् ।