विराटनगर, असार १०–मोरङ चेम्बर अफ कमर्सले उद्योग तथा ठूला व्यापारीहरुलाई लकडाउन अवधिभरको बैंक ब्याज र करमा छुट दिनुपर्ने माग गरेको छ । हालै जारी भएको संघ तथा प्रदेशको बजेटका विषयमा अवधारणा सार्वजनिक गर्ने कार्यक्रममाझ मोरङ चेम्बरले यस्तो अवधारणा अघि सारेको हो ।

कार्यक्रममा अवधारणा प्रस्तुत गर्दै मोरङ चेम्बर अफ कमर्सका अध्यक्ष सुरेशमान श्रेष्ठले साना उद्योगी तथा साना व्यापारीहरुलाई बैंक ब्याज र करमा छुटका साथै ५ लाखसम्मको ऋण मिनाहाको व्यवस्था गर्नुपर्ने बताए । उनले कृषकलाई समेत बैंक ब्याज र करमा छुटका साथै साना किसानबाट लिएको ऋण मिनाहाको ब्यवस्था गर्नुपर्ने लगायतका माग राखे ।

लकडाउनको समयमा नेपाल राष्ट्र बैंकको निर्देशनमा उद्योगी ब्यवसायीहरुलाई बैंक ब्याजमा केही राहतको ब्यवस्था गरेको तर कतिपय बैंक तथा वित्तीय संस्थाहरुले विभिन्न बहाना बनाई निर्देशित छुट नदिएको बताए ।

मोरङ चेम्बर अफ कमर्सले संघ र प्रदेश सरकारले बजेटमार्फत अघि सारेका केही कार्यक्रम सकारात्मक तथा समयसापेक्ष भए पनि त्यसको कार्यान्वयन पक्षको जटिलता भने यथावत रहेको जनाएको छ ।

सरकारी निकायहरुलाई समेत दुरुस्त राख्न नसकिरहेको अवस्थामा निजी क्षेत्रमा पनि अनुगमन गर्ने गरी अख्तियारलाई अधिकार दिने गरी विधेयक ल्याउनु देशका सम्पूर्ण उद्योगी व्यवसायी त्रासमा रहेको संघको भनाइ छ ।

अख्तियारलाई अझ बदनाम गराउने नियतले विधेयक ल्याएको अध्यक्ष श्रेष्ठले आरोप लगाए । कार्यक्रममा संघका वरिष्ठ उपाध्यक्ष सुरेन्द्र गोल्छा, उपाध्यक्ष शिवप्रसाद रिजाल, महासचिव कृष्णप्रसाद दाहाल र कोषाध्यक्ष मनोजकुमार मिश्र लगायत संचारकर्मीहरुको सहभागिता थियो ।