बुटवल, ८ असार-बुटवलबाट रिडीतर्फ जाँदै गरेका ४ वटा सवारी साधन तानसेन नगरपालिका-११ सम्मोबारीमा पहिरोमा पुरिएका छन् । शुक्रबार रातभर आएको अविरल वर्षाका कारण खसेको पहिरोले सडकमा गुडिरहेका पानीक ट्यांकर, ट्रक र पिकअप जिप र कार पुरिएको प्रहरीले जनाएको छ ।

प्रदेश-५ प्रहरीका अनुसार लु १ क १९२८ ट्याङ्कर, लु २ ख १३७६ मिनि ट्रक, लु १ च ७०११ अल्टो कार (ट्याक्सी) लु २ त ७०४३ पिक अप जीप (कुखुरा बोक्ने) पहिरोसँगै बगेका हुन् । प्रहरीका अनुसार शुक्रबार रातभर आएको अविरल वर्षाका कारण खसेको पहिरोले यी सवारी साधन रोकेर राखिएको थियो । त्यही बेला माथिबाट पहिरो आएको हो ।

सडक तलबाट २ जनाको शव निकालिएको जिल्ला प्रहरी कार्यालय पाल्पाले जनाएको छ । १ जना व्यक्तिलाई गम्भीर अवस्थामा उद्धार गरिएको छ । उनको मिसन अस्पतालमा उपचार भइरहेको बताइएको छ । ‘घटनामा के कति मानवीय क्षति भयो भन्ने खुलेको छैन । उद्धार हुँदैछ’ प्रदेश-५ का ट्राफिक प्रहरी कार्यालय बुटवलका प्रहरी नायव उपरिक्षक डिल्लिनारायण पाण्डेले भने । उनका अनुसार गाडी रोकिराखेका कारण गाडीमा यात्रु तथा चालक थिएनन् ।

घटनास्थलका प्रत्यक्षदशीका अनुसार ट्यांकर ३०० मिटर तल खोचमा पुगेको छ भने ट्रक २० मिटर तल पुरिएको अवस्थामा छ । कार र जिप सडकमै माथि आधा पुरिएको अवस्थामा देखिएका छन् भने ट्रक सडकदेखि तल पुगेको देखिन्छ । प्रत्यक्षदशीका अनुसार ट्यांकर त्योभन्दा तल पुगेको छ । घटनास्थल पाल्पाको तानसेन बजारदेखि ५ किलोमिटर टाढा तम्घास जाने बाटोमा पर्छ ।