विराटनगर, जेठ २७–प्रदेश नं. १ बाट मंगलबार ३४ जनाले कोरोनालाई जितेर घर फर्किएका छन् । विराटनगर स्थित कोशी अस्पताल कोभिड–१९ उपचार केन्द्रबाट ६ र सुनसरीको धरानस्थ्ति वीपी कोइराला स्वास्थ्य विज्ञान प्रतिष्ठानमा रहेको कोभिड १९ अस्पतालबाट २८ जना कोरोना संक्रमित उपचारपछि डिस्चार्ज भएका हुन् ।

कोशी अस्पताल कोभिड–१९ उपचार केन्द्रबाट उदयपुरको भुल्केकी ४५ बर्षीया हुसुना खातुन, सोलुखुम्बुका २८ बर्षीय एकराज मगर, झापाका २९ बर्षीय सुमन मुर्मु, १९ बर्षीय तालिम आलम, १९ बर्षीय कासिप आलम र २५ बर्षीय सहलम आलम डिस्चार्ज भएका हुन् ।

सो उपचार केन्द्रबाट हालसम्म ६३ जना संक्रमित निको भएर घर फर्केका छन् भने अहिले २३ जना उपचाररत रहेको केन्द्रका ईन्चार्ज तथा जिल्ला स्वास्थ्य कार्यालय मोरङका प्रमुख ज्ञान बहादुर बस्नेतले जानकारी दिए । उनका अनुसार पछिल्लो २ पटक पिसिआर परीक्षण गर्दा नेगेटिभ रिपोर्ट आएपछी उनीहरुलाई डिस्चार्ज गरिएको हो ।

त्यस्तै सुनसरीको धरानस्थ्ति वीपी कोइराला स्वास्थ्य विज्ञान प्रतिष्ठानमा रहेको कोभिड–१९ अस्पतालबाट मंगलबार झापाको कचन कबल गाउँपालिकाका २८ जना कोरोना संक्रमित उपचारपछि डिस्चार्ज भएका हुन् । पछिल्लो परीक्षण रिपोर्ट नेगेटिभ आएपछी उनीहरुलाई डिस्चार्ज गरिएको प्रतिष्ठानका प्रवक्ता डा. निदेश सापकोटाले जानकारी दिए ।

डा. सापकोटाका अनुसार उनीहरू १८ देखि ५६ वर्षका उमेर समूहका पुरुषहरू रहेका छन् । प्रतिष्ठानमा अव ५५ जना कोरोना संक्रमितहरूको उपचार भइरहेको छ । उनीहरू सबैको स्वास्थ्य अवस्था सामान्य रहेको प्रतिष्ठानले जनाएको छ । बीपीमा पहिलो पटक १८ जना डिस्चार्ज भएका थिए ।

दोस्रो पटक ३ जना र तेस्रो पटक १२ जना डिस्चार्ज भइसकेका छन् । बीपीले ५ हजार ५ सय १४ जनाको पीसीआर परीक्षण गरेकोमा १४६ जना कोरोना संक्रमित देखिएका छन् । मंगलबारसम्म धरानबाट डिस्चार्ज हुनेको संख्या ६१ पुगेको छ । प्रदेश १ मा कोरोना मुक्त हुनेको संख्या १२४ पुगेको छ ।

प्रदेशमा मंगलबारसम्म १२ हजार ७ सय ७२ जनाको नमुना संकलन तथा परिक्षण गरिएकोमा २ सय ८२ जनामा कोरोना संक्रमण पुष्टि भएको छ । १० हजार ७ सय २९ जनाको रिपोर्ट नेगेटिभ आएको मुख्यमन्त्री तथा मन्त्री परिषदको कार्यालयले जनाएको छ । कोरोना पुष्टि भएकाहरुको कोशी अस्पताल कोभिड १९ उपचार केन्द्र विराटनगर, पूर्वाञ्चल विश्वविद्यालय मेडिकल कलेज गोठगाउँ र बीपी कोइराला स्वास्थ्य विज्ञान प्रतिष्ठान धरानमा उपचार भइरहेको मुख्यमन्त्री कार्यालयले जनाएको छ ।