काठमाडौं, २५ जेठ-नवलपरासीमा गोली चलेको छ । भारत हुँदै अवैधरूपमा रासायनिक मल ल्याउन खोज्ने सवारी चेकजाँच गर्ने क्रममा चेक पोष्टमा रहेका सशस्त्र प्रहरीमाथि आक्रमण भएपछि सशस्त्र प्रहरी बलले गोली चलाएको हो ।

नवलपरासीको प्रतापपुर गाउँपालिका-५ बसहिया चेक पोस्टमा खटिएका सशस्त्र प्रहरी सहायक निरीक्षकको टोली माथि २ सय बढी जनाकाे समूहले आक्रमण  गर्न थालेपछि सशस्त्र प्रहरीले हवाई फायर गरेको सशस्त्र प्रहरीले जनाएको छ ।

उक्त चेक पोष्टमा रहेका ६ जना सशस्त्र प्रहरी घाइतेसमेत भएका छन् । घटनामा घाइतेका भएका ६ मध्ये २ जनाको आँखामा गम्भीर चोट लागेकाे बताइएको छ ।

आँखामा गुलेलीको ढुङ्गा लागेर गम्भीर घाइते भएका जवान गणेश ज्ञवाली र कमल रावललाई थप उपचारका लागि रण अम्बिका आँखा अस्पताल भैरहवा लगिएको छ । बाँकी घाइतेको भने जिल्ला अस्पताल परासी उपचार भइरहेको छ ।