एजेन्सी, जेठ २३-मलेरियाको औषधि हाइड्रोक्सिक्लारोक्विन कोरोना भाइरसका विरामीको उपचारमा घातक रहेको निष्कर्षसहितको अनुसन्धान प्रतिवेदन फिर्ता लिइएको छ ।

हाइड्रोक्सिक्लोक्विन औषधि कोरोना भाइरसका संक्रमितलाई दिएमा मृत्यु हुने  वा मुटुमा समस्या आउने जोखिम रहेको सो प्रतिवेदनमा औल्याइएको थियो ।

द लेन्सेट जर्नलमा प्रकाशित अनुसन्धान प्रतिवेदनका तीन प्रमुख अनुसन्धानकर्ताले सो अनुसन्धानको सत्यता वा तथ्यबारे आफूहरुले ठोकुवाका साथ भन्न नसक्ने बताएपछि प्रतिवेदन नै फिर्ता भएको छ ।

स्वास्थ्य सेवा सम्बन्धी अमेरिकी कम्पनी सरजिस्फेयरले तथ्यांकमा जालझेल गरेको उनीहरुले बताएका छन् । सरजिस्फेयरले तथ्यांकको स्वतन्त्र पुनरावलोकन गर्न नदिएका कारण अनुसन्धानको सत्यताको वकालत गर्न आफूहरु असमर्थ रहेको उनीहरुले बताएका छन् ।

सो अनुसन्धान प्रतिवेदन सार्वजनिक भएपछि विश्व स्वास्थ्य संगठनले हाइड्रोक्सिक्लोरोक्विनको परीक्षण तत्कालका लागि रोकेको थियो । तर आफ्ना विज्ञहरुको सुझावपछि डब्लुएचओले पुनः अनुसन्धान सुरु गरिसकेको छ ।

प्रतिष्ठित वैज्ञानिक जर्नल द लेनसेटमा गत महिना प्रकाशित अनुसन्धान प्रतिवेदनमा हाइड्रोक्सिक्लोरोक्विन र क्लोरोक्विनको प्रयोगले कोभिड–१९ का बिरामीको मृत्यु हुने जोखिम बढी भएको उल्लेख छ ।  यद्यपि अहिलेसम्म मलेरियाविरुद्ध प्रयोग हुने यो औषधि कोरोना भाइरसको उपचारमा प्रभावकारी हुने प्रमाण फेला परेको छैन ।