विराटनगर, जेठ २२–प्रदेश नम्बर १ का सामाजिक विकास मन्त्री जीवन घिमिरेले मोरङको रतुवामाई नगरपालिकामा रहका क्वारेन्टाइनहरुको निरिक्षण गरेका छन् । संविधानसभा सदस्य तथा नेकपा मोरङका अध्यक्ष ऋषिकेश पोखरेलको पहलमा स्वास्थ्य प्राविधिक टोलीका साथमा पुगेका मन्त्री घिमिरेले बिहिबार क्वारेन्टाइनहरुको निरिक्षण गरेका हुन् । नगरका सबै क्वारेनटाइनहरुको निरिक्षण गर्ने भनिएको भए पनि उनले समय अभावका कारण दुईवटा क्वारेन्टाइनको मात्र निरिक्षण गरे ।

वडा नम्बर १ को शारदा आधारभूत विद्यालय र वडा नम्बर ६ को सौठा माध्यमिक विद्यालयको उनले निरिक्षण गरे । निरिक्षण पश्चात मन्त्री घिमिरेले नगरपालिकालाई एक सय थान भिटिएम हस्तान्तरण गरे । पीसीआर परिक्षणका लागि भिटिएममा राखेर स्वाब संकलन गर्ने गरिन्छ ।
मन्त्री घिमिरेको निरिक्षण टोलीमा संविधानसभा सदस्य ऋषिकेश पोखरेल, प्रादेशिक प्रयोगशाला प्रमुख जयन्द्र यादव लगायत थिए ।

सामाजिक विकास मन्त्रालयले नगरलाई आवश्यक पर्ने थप आरडिटी कीट र भिटिएम क्रमश उपलब्ध गराउँदै जाने मन्त्री घिमिरेले बताए । सामाजिक विकास मन्त्रालयले दिदैँ आएको आरडिटी कीट र भिटिएमले बिशेष गरेर भारतबाट फर्किएका स्थानीयको कोरोना परीक्षणमा ठुलो टेवा पुगेको रतुवामाई–८ का वडाअध्यक्ष गोपि चापागाइले बताए ।

रतुवामाईमा अहिले सातवटा क्वारेनटाइन रहेका छन् । यी क्वारेन्टाइनहरुमा हाल ३४२ जना रहेको नगरपालिकाका स्वास्थ्य शाखा प्रमुख सन्तोष शाहले जानकारी दिए । उनका अनुसार अहिलेसम्ममा ३७ जना क्वारेन्टाइनबाट घर फर्किएका छन् । नगरपालिकाले सामाजिक विकास मन्त्रालयबाट यस अघि दुई पटक गरी एक सय थान भिटिएम प्राप्त गरिसकेको उनले जानकारी दिए ।

रतुवामाईमा अहिलेसम्म दुई जनामा कोरोना पोजेटिभ पुष्टि भएकोमा १ जना बिहिबारनै डिस्चार्ज भएका छन् । एक जनाको विराटनगर स्थित कोशी अस्पताल कोभिड १९ उपचार केन्द्रमा उपचार भइरहेको रतुवामाई नगरपालिकाका मेयर रवीन राईले जानकारी दिए । यसैबिच भारतबाट आएर नगरका विभिन्न क्वारेन्टाइनमा बसेका नगरवासीहरुको पिसिआर परिक्षणका लागि स्वाव संकलन गरिएको वडाअध्यक्ष चापागाईले जानकारी दिए ।