जनकपुर, २२ जेठ-प्रदेश २ सरकारको प्रदेशसभाको चौथो अधिवेशन बुधबारदेखि सुरू भएको छ । बजेट ल्याउनु पर्ने चटारोका कारण प्रदेश २ को चौथो अधिवेशन कोरोना महामारीको त्रासकाबीच सुरू भएको हो ।

अधिवेशनमा प्रस्तुत गरिएकोे आगामी आर्थिक वर्षको बजेटमा प्रदेश २ सरकारले महामारीको सङ्कट टार्न स्वास्थ्य संरचनामा सुधार र सङ्कटबाट उत्पन्न बेरोजगारी समस्यालाई समाधान गर्नेमा जोड दिइने भएको छ ।

प्रदेशका आर्थिक मामिला तथा योजनामन्त्री विजय यादवले आगामी वर्षको बजेटको पूर्वतयारीस्वरुप विधेयकमा समावेश गरिएका कुरामा जानकारी गराए । प्रस्तुत गरेको विधेयकमाथि आगामी दिन बस्ने प्रदेशसभाको बैठकमा छलफल गरिने छ ।