काठमाडौं, २१ जेठ-जिल्ला-जिल्लाबाट व्यवसायीले लकडाउनको अवज्ञा गर्ने चेतावनी दिएसँगै सरकारले लकडाउनको मोडालिटी परिवर्तन गरी लागू गर्ने कार्यमा छलफल सुरु गरेको छ । मंगलबार कोरोना रोकथाम तथा नियन्त्रण उच्चस्तरीय समन्वयन समितिको बैठकले निजी क्षेत्रसँग परामर्श गरेको थियो ।

बुधबार लकडाउन मोडालिटी परिवर्तन गरेर कसरी सुरक्षित राख्ने भन्ने सन्दर्भमा प्रधानमन्त्री केपी शर्मा ओलीलले विभिन्न क्षेत्रका २ दर्जन बढी विज्ञलाई बोलाएर छलफल सुरु गरेका छन् । प्रधानमन्त्रीका प्रेस सल्लाहकार सूर्य थापाका अनुसार विशिष्ठ व्यक्तित्वहरूसँगको परामर्श बैठक प्रधानमन्त्री निवास बालुवाटार बसिरहेको छ ।

उनले बैठकमा योजना, अर्थव्यवस्था, चिकित्सा, नर्सिङ क्षेत्र र सामाजिक अभियन्ताहसहित २ दर्जनभन्दा बढी व्यक्तित्वहरूसहित उपप्रधानमन्त्री तथा रक्षामन्त्री, परराष्ट्रमन्त्री र स्वास्थ्यमन्त्रीको सहभागिता रहेको जानकारी दिए ।

बैठकमा जनस्वास्थ्यविद्, अर्थशास्त्री, सामाजिक अभियन्ता र विभिन्न क्षेत्रका विशेषज्ञहरूले कोरोना महामारीविरूद्धका आगामी कदमबारे सुझाव दिइरहेको परराष्ट्मन्त्री प्रदीप ज्ञावलीले जानकारी दिएका छन् ।