एजेन्सी, जेठ २०-अमेरिकामा गत सोमबार मृत्यु भएका जर्ज फ्लोइडको मृत्यु मानव हत्या भएको पोष्टमार्टम रिपोर्ट आएको छ । आधिकारिक पोष्टमार्टम रिपोर्टमा उनको मृत्युको कारण ‘होमोसाइड’ अर्थात मानव हत्या भएको उल्लेख गरिएको छ ।

अमेरिकाको मिनेशोटा राज्यको मिनियापोलिस प्रहरी हिरासतमा फ्लोइडको गत २५ मेमा मृत्यु भएको थियो । त्यसअघि उनलाई नियन्त्रणमा लिने क्रममा एक प्रहरी अधिकारीले उनको घाँटी करिब ८ मिनेटसम्म थिचेका थिए । फ्लोइडको मृत्युलाई लिएर अमेरिकाभर अफ्रिकन मुलका अमेरिकीहरुले प्रदर्शन गरिरहेका बेला पछिल्लो रिपोर्ट बाहिर आएको हो ।

प्रहरीले घाँटी थिचेर पक्राउ गर्ने क्रममा फ्लोइडलाई कार्डिक अरेस्ट भएको देखिएको पोष्टमार्टम रिपोर्टमा उल्लेख छ । रिपोर्टमा फ्लोइडको मृत्युको कारणका रुपमा ‘पक्राउ गर्ने क्रमको क्रुरता तथा घाँटी थिचिँदा भएको कार्डियोपल्मोनरी अरेस्ट’ भनी उल्लेख छ ।

फ्लोइडमा मुटु सम्बन्धी समस्या रहेको र उनले औषधि सेवन गरिरहेको प्रमाण समेत फेला परेको छ । फ्लोइडको परिवारले गरेको पोष्टमार्टममा पनि उनको मृत्युलाई मानवहत्या नै भनिएको थियो । सोही अनुसार पक्राउ परेका प्रहरी अधिकारीमाथि पहिलो स्तरको हत्या अभियोगमा मुद्दा चलाउनुपर्ने उनको परिवारका वकिलले बताएका छन् ।