सुर्खेत, १९ जेठ-सल्यानको बनगाड कुपिण्डे नगरपालिकामा कोरोना संक्रमित खुला चौरमा रात बिताएका छन् । नगरपालिका भित्रका २५ जना संक्रमितमध्ये १३ जनाले खुल्ला चौरमा त्रिपाल टागेर रात बिताएका हुन् ।

२५ जनामध्ये १२ सल्यानलाई अस्पताल लगिए र बाँकी रहेका  १३ जनालाई सुर्खेत अस्पतालमा लैजान नसकेका कारण उनीहरु रातभर खुला चौरमा बास बस्नु परेको हो । ‘रातभर पानी परेका थियो । चिसोले निदाउनै सकिएन,’ उनीहरुमध्ये एक जनाले भने, ‘हामी वनगाड क्याम्पसको चौरमा रातभर बसेका छौं ।’

भारतबाट आएका ३ सय ९३ जनामध्ये ९० जनाको रिपोर्ट आएको  र त्यस मध्य २५ जना संक्रमित भेटिएका थिए । जिल्लामा १७ जेठमा भेटिएका कोरोना भाइरस संक्रमितलाई रुकुम पश्चिमको चौरजहारी कोरोना विषेश अस्पतालले लिन नमानेपछि अहिले नगरपालिकाकै एक विद्यालय भवनमा राखिएको  हो ।

चौरजहारी अस्पतालले लिन नमानेपछि सुर्खेत पठाउने तयारी गरिएका बनगाडका १३ जनालाई अहिले ६ नम्बर वडाको बनगाड क्याम्पसमा सुनौलीमा छुट्टै राखिएको नगरपालिकाका निमित्त प्रमुख प्रशासकीय अधिकृत मोहन खड्काले बताए ।

जिल्लामा आवश्यक आइसोलेशनको अभावमा बाँकी संक्रमित १३ जनालाई चौरजहारी कोरोना विषेश अस्पतालले राख्न नमानेपछि सुर्खेत पठाउने तयारी भइरहेको नगरपालिकाले जनाएको छ ।

कर्णाली प्रदेश सरकारले सुरुमै ५० लाख बजेट दिएर सल्यान, जाजरकोट र रुकुम पश्चिमका कोरोना संक्रमित राख्नको लागि चौरजहारी कोरोना विषेश अस्पताल बनाएको थियो ।