विराटनगर जेठ १८–पूर्वमन्त्री तथा नेपाल कम्युनिष्ट पार्टी(नेकपा) का सांसद शिवकुमार मण्डलले सरकारले एमसिसि पारित गराउन छलकपट गरिरहेको आरोप लगाएका छन् । नेकपा केन्द्रीय सदस्यसमेत रहेका सांसद मण्डले सरकारले षड्यन्त्रपूर्वक ढंगले संसदमा एमसिसि ल्याउन खोजेको आरोप लगाएका हुन् ।

‘जुन विषय संसदबाट पारितनै भएको छैन, त्यसका लागि यति धेरै बजेट बिनियोजन भएको छ । षडयन्त्रपुर्वक ढंगबाट बजेट र कपटपूर्ण विधिबाट एमसिसि आयो ।’ उनले भने,‘यो सरकारको अत्यन्त निन्दनिय र गैर जिम्मेवार कृयाकलाप हो ।’

उनले नेकपा केन्द्रीय कमिटिले एमसिसि अध्ययन पश्चात छानविन समिति बनाएको बताउँदै पासनै गर्नुपर्ने भएपनि परिमार्जिनसहित हुनुपर्ने पार्टीको अडान रहेकाले पार्टीलाईनै सरकारले छक्काएर एकलौटिरुपमा बजेट मार्फत एमसिसि ल्याएर सरकार कुनै शक्तिकेन्द्रको मतियार बन्न लागेको आरोप लगाए ।

‘नेकपा केन्द्रीय कमिटिको बैठकमै यो विषय गम्भिर रुपले उठेको विषय हो । कमडेर झलनाथ खनालको संयोजकत्वमा गठित अध्ययन कार्यादलले दिएको निष्कर्ष विपरित एमसिसिको परियोजना षड्यन्त्रपूर्वक लागु गर्न खोजिएको छ । राष्ट्रहित विपरित हुने यस्ता कार्य कुनै हालतमा मान्य हुँदैन । केन्द्रीय कमिटिले विगतदेखि उठाएको विषयलाई छलद्धारा पास गर्न खोजिएको छ ।’ उनले भने,‘एमसिसि राष्ट्रहित विपरित भएको थप पुष्टि भएको छ, सरकार कुनैन कुनै शक्तिकेन्द्रको मतियार बन्नु हुँदैन । गल्ति सच्याउनुपर्छ ।’

उनले पार्टीले बनाएको कार्यदलले एमसिसिका विषयमा छलफल गरेर धारणा नबनाइकन विपक्षिको उक्साहट र बैदेशिक शक्तिकेन्द्रको इसारामा सरकार चल्न खोजेको दावी गरे । ‘कार्यदलको सुभाव अनुसार पार्टीले आधिकारीक धारणानै नबनाइकन, कांग्रेसको उक्साहट र बैदेशिक शक्तिकेन्द्रको इसारामा सरकारले बजेट मार्फत एमसिसि छिराउन खोजेको छ ।’ उनले भने,‘सरकारको यस्तो गतिविधि निन्दनिय हो । यस्ता खाले गतिविधि सरकारले नगरोस् ।’