कोरोना भाइरस (कोभिड-१९) को शंकास्पद बिरामीको नमुना परीक्षण विराटनगरबाट पनि गरिने भएको छ । कोसी अस्पताल विराटनगरबाट शंकास्पद व्यक्तिको नमुना परीक्षण गरिने भएको हो ।

विराटनगरबाट कोरोना परीक्षणका लागि आवश्यक तयारी गरिएको प्रदेश-१ का सामाजिक विकासमन्त्री जीवन घिमिरेले बताए । परीक्षणका लागि आवश्यक उपकरणहरू र केमिकलहरू आज हेलिकोप्टरबाट विराटनगर आइपुगेको मन्त्री घिमिरेले बताए । उनले भने, ‘सम्भवत भोलिदेखि परीक्षणको तयारी गरिएको छ ।’ कोसी अस्पतालबाट नमुना परीक्षण सुरु भएपछि दैनिक करिब ९६ जनाको नमुना संकलन गर्न सकिने मन्त्री घिमिरेले बताए ।

सुनसरीको धरानबाट दैनिक करिब २० जनासम्म नमुना संकलन भइरहेको उनले बताए । नमुना संकलन गर्नुपर्ने संख्या बढेसँगै विराटनगरबाट पनि परीक्षण सुरु गर्न लागिएको सामाजिक विकासमन्त्री घिमिरेले बताए । उनले भने, ‘प्रदेश-१ का १४ जिल्लाबाट नमुना संकलन गरी धरान र विराटनगरमा परीक्षण गरिनेछ ।’ विराटनगरबाट गरिने कोरोना परीक्षणका लागि पहिलो चरणमा ६ सय जनाको नमुना संकलन गर्न पुग्ने केमिकल ल्याइएको वीर अस्पतालका जेनेटिक साइन्टिस्ट तथा कोरोना परीक्षण विज्ञ समूहका बलराम गौतमले बताए ।

यसैबीच, भोलिदेखि प्रदेश-१ का क्वारेन्टाइनबाट र्‍यापिड डायग्नोस्टिक टेस्ट (आरडीटी) गरिने भएको छ । भोलि झापाको मेचीनगर र भद्रपुरमा नेपाली सेनाको क्वारेन्टाइनमा रहेकाहरूको आरडीटी सुरु हुने प्रदेश १ जनस्वास्थ्य प्रयोगशालाका निर्देशक जयवेन्द्र यादवले जानकारी दिए । उनले आरडीटीका लागि प्राविधिकहरूलाई तालिम दिइसकिएको बताए । उनका अनुसार पहिलो चरणमा ५ हजारको काेराेना टेस्ट गरिनेछ ।