विराटनगर, १७ जेठ-सुनसरी बारहक्षेत्र–३ बाङगे बस्ने ३७ वर्षीय कमल राईको हत्या आरोपमा २ जना पक्राउ परेका छन । पक्राउ पर्नेमा सुनसरी बराहक्षेत्र ईक्राहीका २२ वर्षीय गणेश लिम्बू र सोही स्थानका १९ वर्षीय प्रदीप राजधामी रहेका छन् ।

पक्राउ परेका दुवैले रिसइबीको कारण योजनाबद्ध रूपमा कमललाई प्लटिङ जग्गामा लगी लाठ्ठीले टाँउको तथा शरीरका संवेदनशील अंगमा कुटपिट गर्दा उनको मृत्यु भएको जिल्ला प्रहरी कार्यालय सुनसरीले जनाएको छ । घटना सम्बन्धमा कानुनी कारबाही तथा अन्य थप अनुसन्धान भइरहेको प्रहरीले जनाएको छ ।

शरीर तथा टाँउकोमा चोटसहित संकास्पद अवस्थामा मृत फेला परेका कमलको घटना सम्बन्धमा अनुसन्धान गर्दा उनको हत्या भएको प्रहरीले निष्कर्ष निकालेको थियो । हत्या भएको पुष्टि भएसँगै अनुसन्धान थालेको प्रहरीले राईको हत्यामा संलग्नलाई पक्राउ गरेको हो । मृतक राई शुक्रबार विहान बराहक्षेत्र–३ ईक्राही जमुनाकित्ता स्थित प्लटिङ जग्गामा मृत अवस्थामा फेला परेको प्रदेश प्रहरी कार्यालय विराटनगरले जनाएको छ ।