काठमाडौं, १६ जेठ-अर्थमन्त्री डा. युवराज खतिवडाले ७ प्रतिशत नेपालको औषत आर्थिक वृद्धिदर पुगेको दाबी गरेका छन् । आगामी आर्थिक वर्षमा ७ प्रतिशतको आर्थिक वृद्धिदरको लक्ष्यसहित बजेट विनियोजन गरेका अर्थमन्त्री खतिवडाले अर्थतन्त्र केही शिथिल भएको स्वीकार्दै ७ प्रतिशत औषत र सामान्य अवस्थामा पूरा गर्न सकिने लक्ष्य भएको बताएका हुन् ।

खतिवडाले पछिल्ला ४ आर्थिक वर्षमा करिब ७ प्रतिशतको आर्थिक वृद्धिदर भएको र त्यो नेपालको लागि सहज स्थिति रहेको बताए । तर, पछिल्ला वर्षमा पनि अधिक वृद्धिदर नै ७ प्रतिशत र त्यसअघि वर्षमा ६ प्रतिशतको हाराहारीमा नेपालको आर्थिक वृद्धिदर भएको छ ।

अर्थमन्त्री खतिवडाले १५ पञ्चवर्षीय योजनाअनुसार साढे ९ प्रतिशतको आर्थिक वृद्धिदरको लक्ष्य राख्नु पर्ने भए पनि आगामी आर्थिक  वर्षमा पूरा गर्न सक्ने गरी ७ प्रतिशत राखिएको बताए । अर्थ मन्त्रालयले गरेको भर्चुअल पत्रकार सम्मेलनमा उनले ७ प्रतिशतको आर्थिक वृद्धि गर्ने जग बसिसकेको प्रतिक्रिया दिएका छन् ।