जनकपुर, १४ जेठ-वीरगञ्जको विशेष कोरोना गण्डक अस्पतालमा उपचारार्थ २१ जनाले कोरोना जितेका छन् । विशेष कोरोना गण्डक हस्पिटलमा उपचाररत रहेका ३० संक्रमितमध्ये २१ जनाले कोरोना जितेका हुन् ।

मंगलबार राती डिस्चार्ज हुनेमा २१ जना सबै पर्साको वीरगन्ज महानगरपालिकाका हुन् । डिस्चार्ज हुनेमा १७ पुरुष र ४ जना रहेका छन् । जसमा १५ महिने बालकसहित ३ जना बालबालिका पनि रहेको विशेष कोरोना गण्डक अस्पतालका कोर्डिनेटर डाक्टर उदय नारायण सिंहले जानकारी दिए ।

गण्डक अस्पतालबाट डिस्चार्ज भएकाहरूलाई वीरगन्ज महानगरपालिकाका मेयर विजयकुमार सरावगी र स्वास्थ्यकर्मीले फूल दिएर विदाई गरेका थिए ।

अस्पतालमा ल्याएर राखिएपछि लगातार दोस्रो पटकको पीसीआर रिपोर्ट नेगेटिभ आएका २१ जनाको स्वास्थ्य अवस्था पनि सामान्य रहेकाले डिस्चार्ज गरिएको डा. सिंहले बताए । वीरगन्जको अस्पतालबाट भर्ना भएका १ सय २ संक्रमितमध्ये मंगलबारसम्म ९३ जना निको भएर घर फर्किएका छन् ।

२९ चैतदेखि ११ जेठसम्म पर्सा, अन्य जिल्लाका र भारतीय गरेर १ सय २ जना संक्रमितलाई उपचारका लागि भर्ना गरिएकी थियो । जसमध्ये मंगलबारसम्म ९३ डिस्चार्ज भएको नारायणी अस्पतालका मेडिकल सुपरिटेन्डेन्ट (मेसु) डा. मदन उपाध्यायले जानकारी दिए ।

पछिल्लो ४ दिनमा मात्रै ९१ जना निको भए अस्पतालबाट घर फर्किएका हुन् । सोमबार मात्रै वीरगन्जको नारायणी अस्पालबाट ४३ जना डिस्चार्ज भएका थिए । गत आइतबार राती पनि वीरगन्ज ३ छपकैयाको एकै परिवारका २ महिने शिशु र १० बालबालिकासहित १८ जनाको डिस्चार्ज गरिएको थियो । गत शनिबार पनि ९ जना डिस्चार्ज भएका थिए ।

पहिलो पटक १४ वैशाखमा २ जना संक्रमित निको भएर अस्पतालबाट घर फर्किएका थिए । मंगलबार राती २१ जना डिस्चार्ज भएपछि वीरगन्जको आइसोलेनमा अब ९ जना मात्रै संक्रमित उपचाररत छन् ।
पर्सामा ३ हजार ८० जनाको थ्रोट स्वाब नमुना संकलन गरी परीक्षणका लागि पठाइएकोमा २ हजार ९ सय ५५ जनाको रिपोर्ट आइसकेको छ । मंगलबार १ सय जनाको नमुना संकलन गरिएको छ ।

कोरोना संक्रमितको उपचारको लागि पर्सामा १ सय २८ बेड क्षमताको आइसोलेसन बेड रहेकोमा ७० बेड क्षमताको नारायणी अस्पताल खाली छ । कोरोना संक्रमित डिस्चार्ज भएपछि जनरल सेवा सञ्चालन गर्ने उद्देश्यले मंगलबार स्यानिटाइजेसन गरिएको छ । गण्डक कोरोना विशेष अस्पतालमा ५० र पोखरिया नगरपालिकामा ८ बेडको आइसोलेसन छ । हालसम्म आरडीटी टेस्ट २ हजार ४ सय ६६ जनाको गरिएको छ ।

५ सय बढी व्यक्ति क्वारेन्टाइनमा

पर्साका १४ वटा पालिकामा सञ्चालित २९ क्वारेन्टाइनमा ३४ महिला र ४ सय ९८ पुरुषसहित ५ सय ३२ जना शंकास्पद संक्रमितलाई राखिएको छ । भारतबाट आएका, कन्ट्याक्ट ट्रेसिङमा परेका, स्वाब संकलन गरिएको तर रिपोर्ट नआएका शंकास्पद व्यक्तिलाई क्वारेन्टाइनमा राखिएको पर्साका सहायक प्रमुख जिल्ला अधिकारी ललित कुमार बस्नेतले जानकारी दिए ।

पर्सामा क्वारेन्टाइनको कुल बेड क्षमता १२ सय ६५ छ । क्वारेन्टाइनमा १४ दिन पूरा गरी पीसीआर परीक्षण रिपोर्ट नगेटिभ आएपछि ४ सय २५ जनालाई होम क्वारेन्टाइनमा बस्न भनिएको छ ।