काठमाडौं, १३ जेठ-सांसदले रूकुम चौरजहारीको घटनामा पूर्वगृहमन्त्री जनार्दन शर्मा नै पीडकको पक्ष लिएर राजनीतिक पहुँचका आधारमा दोषीलाई उन्मुक्ति दिने खेलमा लागेको आरोप लगाएका छन् ।

प्रतिनिधिसभाको मंगलबारको बैठकमा सत्तारूढ दलका सांसद जनार्दन शर्माले छुवाछुतको घटनामा राजनीतिकरण हुन सक्दैन भन्ने अभिव्यक्ति दिएपछि सांसदले आपत्ति जनाउँदै सांसद शर्माले घटनाका दोषीलाई जोगाउने षडयन्त्र गरेको आरोप लगाएका हुन् । सांसद शर्मा बोल्दै गर्दा प्रतिपक्षी दलका सांसद तथा अन्य दलित सांसदले उठेर विरोध जनाएका थिए ।

त्यसपछि केही समय सांसद शर्मा र अरू सांसदहरूबीच भनाभन नै चल्यो । सभामुखले सबै सांसदलाई सम्हालिन आग्रह गरेका थिए । तर, केही समय दुवै तर्फबाट भनाभन चलिरह्यो । आरोप प्रत्यारोप चलिरह्यो ।

विपक्षी सांसदलगायत दलित सांसदहरूले शर्मालाई बोल्न रोकेपछि आक्रोशित हुँदै उनले भने, ‘सभामुखले दिएको समयमा बोल्दै गर्दा आपत्ति गर्नु कुन नियमावलीमा छ सभामुख महोदय ? मैले बोल्न पाउँदिनँ ? मेरो बोल्न पाउने अधिकारको हनन् नगरियोस् । म त्यहाँकाे जनप्रतिनिधि नै हुँ । त्यहाँको दलितको अधिकारको कुरा पनि मैले राख्न पाउनुपर्छ । बोल्दाबोल्दै आपत्ति गरेको कुरामा मेरो पनि आपत्ति छ ।’

सांसद शर्माले छुवाछुतसम्बन्धी घटनाहरूमा राजनीतिकरण हुन नसक्ने भन्दै रुकुम चौरजहारी घटनाको सत्यतथ्य छानबिनका लागि जाजरकोट र रूकुम जिल्ला प्रशासन लागिपरेको बताएपछि गृहमन्त्रीले दिनेजस्तो जवाफ दिएको भन्दै कांग्रेसका सांसदहरूले आपत्ति जनाए ।

सांसद शर्मा पनि बोलेका नेपाली कांग्रेसका सांसद प्रकाश रसाइली स्नेहीले पूर्वगृहमन्त्री र वहालवाला गृहमन्त्री मिलेर घटनामा संलग्नलाई जोगाउने षड्यन्त्र गरेको आरोप लगाए ।

यसअघि मंगलबारको बैठकको सुरुमै बोलेका सांसद मीनबहादुर विश्वकर्माले घटनामा राजनीतिकरण भएको भन्दै निष्पक्ष छानबिनका लागि उच्चस्तरीय संसदीय छानविन समिति गठन गर्नुपर्ने माग गरेका थिए । सांसद विश्वकर्माले राजनीतिक दबाब र प्रभावमा जिल्ला प्रशासन कार्यालय परेको भन्दै घटनामा संलग्न भनी पक्राउ गरेका मानिसलाई राजनीतिक पहुँचका आधारमा छोड्ने काम नगर्न सरकारको ध्यानाकर्षण गराएका थिए ।

उनले मुलुकलकै इतिहासमा त्रासदीपूर्ण र कहालीलाग्दो जातीय दुर्घटना भएको भन्दै छुवाछुत मुक्त राष्ट्र घोषणा गरी वेपत्ताको छानबिन गरी मृतकका परिवारलाई राहतको व्यवस्था गर्न माग गरे ।

सांसद पार्वती कुमारी विशुंखेले कानुन बनेर व्यवस्था परिवर्तन भए पनि जातीय विभेदको बर्बरताको अन्त्य हुन नसकेको भन्दै त्यसको अन्त्यका लागि सरकारले के गरिरहेको छ भनी गृहमन्त्रीको ध्यानाकर्षण गराइन् ।

प्रेमलाई वैवाहिक सम्बन्धमा रुपान्तरण गर्ने सपना बोकेर प्रेमिका लिन पुगेका जाजरकोटका नवराज विकसहित ३ जनाले ज्यान गुमाएको तथा अन्य ३ जना अझै बेपत्ता भएको भन्दै उनले जातका कारणले मारिने क्रम कहिलेसम्म हो भनी प्रश्न गरिन् ।

‘अन्तरजातीय विवाहका कारण कतिले मारिनुपर्ने सभामुख महोदय ?’ भनी उनले प्रश्न गरिन् । ‘अन्तरजातीय प्रेम गर्नुको सजाय भनेको मारिनु हो सभामुख महोदय ?,’ उनले भनिन् । घटनाको सत्यतथ्य छानविनका लागि उच्चस्तरीय छानविन समिति गठन गर्नसमेत उनले माग गरिन् ।