काठमाडौं, १२ जेठ-नेपालमा थप २५ जना संक्रमितले कोरोना भाइरसलाई जितेका छन् । स्वास्थ्य तथा जनसंख्या मन्त्रालयका अनुसार कोरोना भाइरसलाई जितेर घर फर्किनेको संख्या १ सय १२ पुगेको छ । पर्साका छप्कैयाका एकै परिवारका १८ जना आइतबार बेलुका डिस्चार्ज भएका हुन् । उनीहरू ४ महिना देखि ६६ वर्षका छन् ।

त्यसैगरी, पाटन अस्पतालबाट ५ जना डिस्चार्ज भएको स्वास्थ्य मन्त्रालयले जनाएको छ । टेकु अस्पतालबाट आजै १ जना सुरक्षाकर्मी डिस्चार्ज भएका छन् । तौलिहवाबाट पनि १ जना स्वास्थ्यकर्मी डिस्चार्ज भएको स्वास्थ्य मन्त्रालयका प्रवक्ता विकास देवकोटाले बताए । उनका अनुसार हिजो र आज  गरेर २५ जना संक्रमित निको भएर अस्पतालबाट डिस्चार्ज भएका छन् ।

स्वास्थ्य मन्त्रालयका अनुसार नेपालमा थप ७ जनामा संक्रमण देखिएको छ । सेती अस्पतलामा गरिएको परीक्षणमा १ जना भेरी अस्पतलमा गरिएको परीक्षणमा ३ जना र नारायणी अस्पतालमा गरिएको परीक्षणमा २ जनामा कोरोना संक्रमण पुष्टि भएको हो । त्यस्तै, नेशनल मेडिकल कलेजनमा उपचारका क्रममा मृत्यु भएका व्यक्तिमा पनि कोरोना पुष्टि भएको छ । योसँगै नेपालमा कोरोना भाइरस संक्रमितको संख्या ६ सय ८२ पुगेको छ ।

स्वास्थ्य मन्त्रालयको सोमबार दिउँसोसम्मको विवरणअनुसार पीसीआर विधिबाट गरिएको नमुना परीक्षणको संख्या ५१ हजार ६ सय ४१ पुगेको छ । त्यसैगरी, आरडीटी विधि ९५ हजार १ सय ९२ जनाको परीक्षण गरिएको छ । गत २४ घण्टाको अवधिमा २ हजार ९ सय ४ नमुना पीसीआर विधिबाट परीक्षण गरिएको छ भने आरडीटी विधिबाट ५ हजार १ सय ६६ जनाको परीक्षण गरिएको छ ।