बुटवल, ११ जेठ-प्रदेश ५ का १२ जिल्ला मध्ये कोरोना संक्रमणबाट सवैभन्दा बढी प्रभावित बाँकेको नरैनापुर हो । नरैनापुर गाउपालिकामा मात्र १ सय १४ जनामा कोरोना संक्रमण पुष्टि भइसकेको छ ।

प्रदेश ५ को अति विकट मानिने नरैनापुरमा कोरोना संक्रमण फैलिन सक्ने र स्थिति भयावह हुने भन्दै स्थानीय तहले थप सुरक्षाकर्मी माग गर्दै जिल्ला प्रशासन कार्यालय बाँकेलाई पत्रचार गरेको छ ।

मधेसी र मुस्लिम समुदाय बाहुल्य गाउपालिकामा अझै पनि कोरोना बारे अन्धविश्वास रहेको र कोरोना भाईरस बारे गाउँमा भ्रम फैलाउने काम भइरहेको गाउपालिकाका प्रमुख प्रशाकीय अधिकृत मणिराम खरालले बताए ।

अहिले पनि गाउँपालिकाका नागरिकहरुमा भ्रम फैलाउने, सुरक्षाकर्मी, स्वास्थ्यकर्मीलाई असहयोग भएको भन्दै गाउँपालिकाले विज्ञप्ति जारी गर्दै सुरक्षाकर्मी माग गरेको हो । ‘सुरक्षाकर्मी र स्वास्थ्यकर्मीलाई अहसोग गर्ने, मनोबल कमजोर पार्ने र संक्रमित भगाउने जस्ता क्रियाकलाप भएको र यस्तो अवस्थामा क्वारेन्टाईनबाट समुदाय स्तर सम्म संक्रमण फैलिन सक्ने र स्थित भयावह हुने सम्भावना देखिएको सन्दर्भमा स्थित नियन्त्रण बाहिर जाने भएकाले तत्काल उच्च स्तरिय चिकित्सकको टोली सहित थप सुरक्षाकर्मी परिचालन गरी नियन्त्रण कार्यलाई अगाडि बढाउने व्यवस्था गर्न अनुरोध छ,’ गाउपालिकाले जारी गरेको विज्ञप्तिमा उल्लेख छ ।

गाउपालिकाका ६ वटै वडा भारतसँग सिमाना जोडिएकाले अहिले पनि नेपाली नाकाबाट प्रवेश गरिरहेका छन् । समुदाय स्तरमा सचेतनाको कमी भएकै कारण क्वारेन्टाईन समेत व्यवस्थापन हुन नसकेको गाउपालिकाले जनाएको छ ।

गाउँपालिकाले हाल १५ वटा क्वारेन्टाईनमा करिव ७ सय छन् । संक्रमणको संख्या अझै बढ्ने आंकलन पनि गरिएको छ । गाउँपालिकाका अध्यक्ष इश्तियाक अहमद शाहले जनताबाटै असहयोग भएकाले थप सुरक्षाकर्मीको माग गर्नुपरेको बताए ।