काठमाडौं, १० जेठ-पछिल्लो महिना सार्क राष्ट्रमा कोरोना संक्रमितको संख्या अत्याधिक बढी देखिएको छ । हालसम्म सार्कका ८ मुलुकमध्ये २ लाख २२ हजारमा ६ सय ४८ जनामा कोरोना संक्रमण देखिएको छन् ।

कोरोना संक्रमितको संख्या सार्क राष्ट्रहरूमा विश्‍वका अन्य राष्ट्रकै तुलनामा वृद्धिदर उच्च देखिएको छ । संक्रमितमध्ये मृत्यु हुनेको संख्या भने सार्क राष्ट्रहरूमा कम देखिएको छ । सार्क राष्ट्रहरूमा संक्रमितका हिसाबले सबैभन्दा कम संक्रमित भुटान रहेको छन् भने त्यपछि नेपालमा रहेका छन् ।

सार्क राष्ट्रमा सबैभन्दा बढी भारतमा संक्रमित रहेका छन् । शनिबार ५ बजेसम्मको अध्यावधि विवरणअनुसार भारतमा १ लाख २५ हजार १ सय ४९ जना संक्रमित भएका छन् । जसमध्ये ३ सय ५५ जनालाई शनिबार मात्रै संक्रमण देखिएको छ । संक्रमितमध्ये भारतमा हालसम्म ३ हजार ७ सय २८ जनाको मृत्यु भएको छ जसमा शनिबार २ जनाको मृत्यु भएको छ ।

भारतपछि धेरै संक्रमित हुनेमा पाकिस्तान रहेको छ । शनिबार १ हजार ७ सय ४३ जना संक्रमित थपिएर ५२ हजार ४ सय ३७ पुगेका छन् । त्यस्तै, शनिबार थप ३४ संक्रमितको मृत्यु हुँदा पाकिस्तानमा कोरोनाका कारण मृत्यु हुनेको संख्या १ हजार ७ सय ४३ पुगेको छ ।

बंगलादेशमा पनि कोरोना संक्रमतिको संख्या निरन्तर बढेको छ । शनिबार थप १ हजार ८ सय ७३ जना संक्रमित थपिएपछि बंगलादेशमा कोरोना संक्रमितको संख्या ३२ हजार ७८ जना पुगेका छन् । संक्रमितमध्ये शनिबार थप २० जनाको मृत्यु भएपछि मृतकको संख्या १ हजार ८ सय ७३ जना पुगेको छ ।

अफगानस्तानमा ९ हजार ९ सय ९८ जना कोरोना संक्रमित रहेका छन् जसमध्ये २ सय १६ जना शनिबार थपिएका छन् । यहाँ शनिबार थप ११ जनाको मृत्यु भएपछि ७८२ जना कोरोना संक्रमितको मृत्यु भएको छ ।

सार्क राष्ट्रमा सबैभन्दा कम जनसंख्या भएको राष्ट्र माल्दिभ्समा पनि कोरोना संक्रमितको संख्या १ हजार २ सय ७४ पुगेको छ भने ४ जनाको मृत्यु भएको छ । श्रीलंकामा कोरोना संक्रमितको संख्या १ हजार ६८ जना पुगेका छन् भने मृत्यु हुनेको संख्या ९ रहेको छ ।

नेपालमा हालसम्म कोरोना संक्रमितको संख्या ५ सय ८४ पुगेकोमा पछिल्लो २४ घण्टामा मात्रै ६८ जना संक्रमित थपिएका थिए । हालसम्म नेपालमा कोरोनाको कारण मृत्यु हुनेको संख्या ३ पुगेको छ ।

सार्क राष्ट्रमा सबैभन्दा कम संक्रमित देखिएको भुटानमा अहिलेसम्म कोरोनाको कारण कसैले ज्यान गुमाउनु परेको छैन । शनिबार थप ३ जना संक्रमित थपिएपछि संक्रमितको संख्या २४ पुगेको छ ।

विश्‍वमा कोरोना संक्रमितमध्ये ६ प्रतिशतको मृत्यु भएकोमा सार्क राष्ट्रहरूमा यस्तो दर २ प्रतिशत रहेको छ । अहिलेसम्म विश्‍वभर ५३ लाख २६ हजार जना कोरोना संक्रमित देखिएका छन् भने ३ लाख ४० हजार जनाको मृत्यु धएको छ ।