विराटनगर, जेठ ९–विराटनगर महानगरपालिका प्रमुख भीम पराजुलीले राष्ट्रिय समाचार समिति प्रदेश नं. १ कार्यालय विराटनगरको जीर्ण भवनको मर्मत सम्भार र रङ्गरोगन भएपछि सन्तुष्टि व्यक्त गरेका छन् ।

वि.स.२०३४ मा निर्माण भएको सो भवनको हाल सम्म मर्मत सम्भार र रङ्गरोगन नभएपछि भवन जीर्ण भएको थियो भने भवनको अवस्थालाई हेरर चालु आर्थिक वर्षमा विराटनगर महानगरपालिकाले १० लाख बजेट विनियोजन गरेपछि अहिले भवनको मर्मत सम्भार र रङ्गरोगन भएको देखेर प्रमुख पराजुलीले प्रशंसा गरे ।

विगतमा पूर्वाञ्चल क्षेत्रीय कार्यालयको रुपमा परिचित सो कार्यालयबाट रासस बुलेटिन प्रकाशित भइरहेको थियो भने सो बुलेटिन वि.स.२०५७ मा प्रकाशन हुन बन्द भइ समाचार सङ्कलन र सम्प्रेषणको काम मात्र भइरहेको यो कार्यालय अहिले प्रदेश कार्यालयको रुपमा रहेको छ ।

प्रमुख पराजुलीले आज कार्यालयको निरीक्षण गर्दै भवनको निर्माणमा बाँकी रहेका काम सम्पन्न गर्न अगामी बजेटमा थप १० लाख बिनियोजन गर्ने घोषणा गरे । प्रमुख पराजुलीले आजै कार्यालय परिसर भित्र दुई वटा अम्रपाली आँप र एक वटा अनारको बिरुवा रोपे । सो अवसरमा रासस प्रदेश कार्यालय प्रमुख मोहम्मद सदरुलले कार्यालयको गतिविधि तथा निर्माणका बारेमा जानकारी गराएका थिए ।