विराटनगर, जेठ ९–भारतसँग सीमा जोडिएको मोरङको दक्षिपूर्वी रतुवामाई नगरपालिकाका थप एक जनामा कोरोना संक्रमण पुष्टि भएको छ । एक जनामा आरडिटि पाजेटिभ देखिएको छ ।
शुक्रबार पिसिआर परिक्षणको नतिजा अनुसार रतुवामाई नगरपालिका–२ घर्रु चोकका ४१ वर्षिय पुरुषमा कोरोना संक्रमण पुष्टि भएको प्रदेश १ सामाजिक विकास मन्त्रालयका प्रवक्ता डा. सुरेस मेहताले जानकारी दिनुभयो । उनी जेठ ७ गते भारतको अहमदाबादबाट घर्रुचोक आएको रतुवामाई नगरपालिकाका नगरप्रमुख रवीन राईले बताए ।
उनीसँगै आएका अन्य २ जनाको रिपोर्ट भने नेगेटिभ आएको छ । त्यस्तै बिहिबार भारतको दिल्लीबाट आएका तीन जनामा गरिएको परिक्षणमा सोही वडाका २५ वर्षिय युवकमा आरडिटि पोजेटिभ देखिएपछी पिसिआर परिक्षणका लागि प्रादेशिक प्रयोगशालामा स्वाब पठाइएको रतुवामाई नगरपालिकाका स्वास्थ्य शाखा प्रमुख सन्तोषकुमार साहले जानकारी दिए ।
यस अघि जेठ २ गते रतुवामाई नगरपालिका–१ सोनापुर नाका स्थित मकैबारीबाट लुकिछिपि नेपाल प्रवेश गरेका स्थानीय २५ वर्षिय युवकमा कोरोना पुष्टि भएको थियो ।
भारतका विभिन्न ठाउँबाट सीमा सम्म आइपुगेका रतुवामाईका नागरिकहरुलाई सीमा क्षेत्रबाट उद्धार गरी ल्याउने क्रम जारी रहेको रस्थानीयको सम्पर्कमा पुग्न नदिई शंकास्पद व्यक्तिहरुलाई सिधै क्वारेन्टाइनमा निगरानीमा राखेर परिक्षण सुरु गरिएको नगरप्रमुख राईले बताए ।
