काठमाडौं, ३ जेठ-कार्यव्यवस्था परामर्श समितिले जेठ ४ र ५ गते सरकारको वार्षिक नीति तथा कार्यक्रममाथि छलफल गर्ने भएको छ । सिंहदरबारमा बसेको प्रतिनिधिसभा कार्यव्यवस्था परामर्श समितिको आजको बैठकले उक्त निर्णय गरेको हो ।

साभमुख अग्निप्रसाद साप्कोटाको अध्यक्षतामा आज बसेको बैठकले जेठ ४ र ५ गते २ दिन छलफल हुुने, सम्पूर्ण सुरक्षा सतर्कता अपनाएर बैठक सञ्चालन गर्ने, सांसदहरूलाई पहिले आफू बसेको सीट परिवर्तन नगर्न अनुरोध गर्ने, छलफल छोटो बनाउने निर्णय भएको संघीय संसद सचिवालयले जनाएको छ । छलफलका क्रममा उठेका प्रश्नको जवाफ प्रधानन्त्री केपी शर्मा ओली ६ गते दिनेगरी व्यवस्था गर्ने निर्णय पनि भएको संघीय संसद सचिवालयले जनाएको छ ।

राष्ट्रपति विद्यादेवी भण्डारीले शुक्रबार नीति तथा कार्यक्रम प्रस्तुत गरेकी थिइन् । जेठ १५ गते सरकारले बजेट प्रस्तुत गर्ने संवैधानिक व्यवस्था रहेको छ ।