गोरखा, ३ जेठ-गोरखाको गण्डकी गाउँपालिका-८ सिउरेनीटारबाट मृगको सिकार गरेको आरोपमा ७ जना पक्राउ परको छन् । पक्राउ पर्नेमा स्थानीयवासी मधु भुजेल, दुर्गाबहादुर भुजेल, खुमबहादुर माझी, डिबी सापकोटा, शिव रेग्मी, पूर्णबहादुर माझी र रोल्पा जिल्ला घर भइ सिउरेनीटार बस्दै आएका इन्द्रजित ओली रहेको डिभिजन वन कार्यालय गोरखाका प्रमुख तोयानाथ पौड्यालले जानकारी दिए ।

शुक्रबार पक्राउ परेकाहरूले रतुवा मृग सिकार गरेको पाइएको उनले बताए । जङ्गलबाट मृगको सिकार गरी घरमा ल्याएर मासु काटेर भागभण्डा गरिरहेको अवस्थामा स्थानीयवासी खुमबहादुर माझीलाई गत आइतबार मासुसहित प्रहरीले पक्राउ गरी डिभिजन वन कार्यलाई बुझाएको थियो भने अन्य भागेका थिए ।

घटनामा संलग्नहरूको खोजी गर्दै जाँदा उनीहरू सबै पक्राउ परेको प्रमुख पौड्यालले बताए । ‘माझीलाई पक्राउ गरी अनुसन्धान गर्दै जाँदा घटनामा संलग्न थप ६ जनाको पहिचान भएपछि उनीहरूलाई पनि पक्राउ गरिएको हो’ उनले भने, ‘पक्राउ परेका सबै मृगको सिकार गर्न सहभागी भएको पाइएको छ ।’

पक्राउ परेकाहरू माथि वन ऐन अनुसारको वन्यजन्तु अवैध सिकार गरेको कसुरमा मुद्दा दर्ता गर्ने गरी अनुसन्धान अघि बढाइने प्रमुख पौड्यालले बताए ।