काठमाडौं, १ जेठ-राष्ट्रिय व्यावसायिक पहल (एनबिआई) ले श्रमिक कामदारको कार्यस्थलमा अवलम्बन गर्नुपर्ने सुरक्षा र सुरक्षित उपाय सम्बन्धमा ‘कोभिड-१९ का लागि आधारभूत व्यावसायिक पूर्वतयारी एवं सञ्चालन’ नामक पुस्तक सार्वजनिक गरेको छ ।

यहाँ आज आयोजित कार्यक्रममा उद्योग, वाणिज्य तथा आपूर्तिमन्त्री लेखराज भट्ट र श्रम, रोजगार तथा सामाजिक सुरक्षामन्त्री रामेश्वर राय यादवले संयुक्त रुपमा उक्त पुस्तकको विमोचन गरे । सो अवसरमा उद्योगमन्त्री भट्टले यस पुस्तकले आर्थिक गतिविधि सुचारू गर्न, श्रमिकलाई सुरक्षित माध्यमबाट काममा फर्किनेवातावरण तयार गर्न सहयोग पुग्ने बताउँदै यसबाट अर्थतन्त्र क्रमशः स्थायित्वतर्फ अघि बढ्ने विश्वास व्यक्त गरे ।

अहिलेको चुनौतीलाई अवसरका रुपमा प्रयोग गर्नुपर्नेमा जोड दिँदै उनले विदेशबाट फर्किएर आएका नेपालीलाई पनि कृषि पेशामा आर्कषण गर्नुपर्ने बताए ।

कोभिड-१९ महामारीमा स्वास्थ्य सुरक्षा नै ठूलो चुनौती हो भन्दै मन्त्री भट्टले अन्तर मन्त्रालय समन्वय गरी कसरी सुरक्षा अपनाउने र उद्योग व्यवसाय कसरी सञ्चालन गर्न सकिन्छ भन्ने विषयमा सरकारको ध्यानाकर्षण भएको बताए ।