विराटनगर, फागुन १६–मोरङको कटहरीस्थित लोहन्द्रा खोलामा तटबन्ध बनाउन सांसदहरूले माग गरेका छन् । आजको प्रदेशसभा बैठकको शून्य समयमा सांसद कल्पना सरदारले मोरङको कटहरीस्थित लोहन्द्र खोलाको विभिन्न स्थानमा कटान गरिरहेका कारण तत्कालै तटबन्ध निर्माण गर्न माग गरेकी हुन् । खोलाको कटानका कारण स्थानीय त्रसित बन्नु परेकाले कटान नियन्त्रणका लागि तटबन्धको व्यवस्था गर्न उनले प्रदेश सरकारको ध्यानाकर्षण गराइन् ।

त्यस्तै संसदमा शून्य समयमा उठेका प्रश्नको जवाफ सम्बन्धित मन्त्रीले नदिएको सांसद सञ्जाकुमारी दनुवारले गुनासो गरेकी छन् । सांसदले शुन्य र विशेष समयमा राखेका प्रश्नको जवाफ मन्त्रीहरूले नदिएर सांसदले उठाएका विषयको अवमूल्यन गरिरहेको दनुवारको गुनासो छ ।

आजको बैठकमा प्रदेश जनस्वास्थ्य सम्बन्धमा व्यवस्था गर्न बनेको विधेयक २०७६को सैद्धान्तिक छलफल सकिएको छ । छलफलमा सांसदहरू उपेन्द्रप्रसाद घिमिरे, बुद्धिकुमार राजभण्डारीलगायतले भाग लिएका थिए । बैठकमा सामाजिक विकासमन्त्री जीवन घिमिरेले प्रदेश जनस्वास्थ्य सम्बन्धमा व्यवस्था गर्न बनेको विधेयक २०७६ माथि सैद्धान्तिक छलफलका क्रममा सांसदहरूले उठाएका जिज्ञासाको जवाफ दिएका थिए । जनस्वास्थ्य सम्बनधमा व्यवस्था गर्न बनेको विधेयकमाथिको सैद्धान्तिक छलफल सकिएकाले विधेयक संशोधनका लागि प्रस्ताव दर्ता गर्न उपसभामुख सरस्वती पोखरेलले ७२ घण्टाको समय दिइन् ।