काठमाडौं, ३१ वैशाख-प्रधानमन्त्री केपी शर्मा ओलीले नेपाली भूमि भारतले अतिक्रमण गरेर सडक बनाउदै गरेकाले त्यसलाई तत्काल रोकेर वार्ता गर्नुपर्ने बताएका छन् । प्रधानमन्त्री निवास बालुवाटारमा भएको सर्वदलीय बैकमा ओलीले नेपालको सीमा काली नदीको मुहान भएकोमा कसैको कुनै विवाद नरहेको बताए ।

आज बालुवाटारमा भएको छलफलमा पूर्वप्रधानमन्त्री, संसदमा प्रतिनिधित्व गर्ने राजनीतिक दलका नेताहरु, पूर्वपरराष्ट्रमन्त्री र सरकारका मन्त्रीहरुसँग छलफल गरेका थिए । उनले उपस्थित सबैको राय सुझाव सुनेका थिए ।

आज भएको छलफलपछि प्रधानमन्त्रीको भनाइ उदृत गदै परराष्ट्रमन्त्री प्रदीप ज्ञवालीले भने, ‘नेपालको पश्चिमी सीमा काली नदीको मुहान हो, यसमा दुईमत छैन । नेपाली भूमि भारतले अतिक्रमण गरेकोले फिर्ता ल्याउन पहल गर्न राजनीतिक दलहरुले सुझाव दिएका छन् । कूटनीतिक रुपमा यो समस्या समाधान गर्न दिएको सल्लाह सुझाव सकारात्मक छन् ।’

ओलीले भारतले जारी गरेको राजनीतिक नक्सापछि वार्ताको पहल गर्दा पनि भारत तयार नभएको ओलीले बैठकमा जानकारी दिएका थिए । भारतले सन् २०१९ मा नेपाली भूमिसहितको नक्सा जारी गरेको थियो ।

ओलीलेका भनाई उदृत गदै ज्ञवालीले भने, ‘भारतको राजनीतिक नक्सा जारी गरेपछि पटक पटक वार्ताका लागि आह्वान गरिएको छ । तर भारत अहिलेसम्म तयार भएको छैन । अहिले भारतले कोरोनाका कारण देखाउदै वार्तामा बस्न चाहेको छैन ।’

भारतले कोरोनाको कारण देखाएपनि प्रधानमन्त्री ओली वार्तामा बस्न तयार रहेको ज्ञवालीले जानकारी दिए । ज्ञवालीले भने, ‘भारतले कालापानी लगायतका क्षेत्रमा समस्या रहेको स्वीकारेको छ ।तर यहि भूमिमा सडक बनाउनु कूटनीतिक र अन्तर्राष्ट्रिय कानुनी मान्यतामा न्यायोचित छैन । कोरोना फैलिएको समयमा सडक बनाउन हुने, वार्ता गर्न किन हुँदैन । भारत वार्तामा बस्नु पर्नेमा प्रधानमन्त्री अडिग हुनुहुन्छ ।’ ओलीले बैठकमा पुर्खाले लडेर बचाएको भूमि फिर्ता ल्याउन सरकार दृढ रहेको समेत बताए ।