विराटनगर, बैशाख ३१–नेपाली कांग्रेसका नेता डा. शेखर कोइरालाले भारतसँगको सीमा विवाद समाधान गर्न सत्तारुढ नेकपा र प्रमुख प्रतिपक्ष नेपाली कांग्रेसले संसदमा संयुक्त संकल्प प्रस्ताव पेश गर्नु आवश्यक रहेको बताएका छन् ।

विराटनगरमा पत्रकारहरुसँग कुरा गर्दै कोइरालाले संसदबाट एउटै संकल्प प्रस्ताव पास गरेर भारत र चीनसँग वार्ता गर्नुपर्नेमा जोड दिए । नेपाली कांग्रेस र सत्तारुढ दल नेकपाले बेग्लाबेग्लै संकल्प प्रस्ताव पेश गरेको प्रसंग जोड्दै नेता कोइरालाले राष्ट्रियताको विषयमा सत्ता र प्रतिपक्ष नहुने जिकिर गरे ।

उनले लामो समयदेखि कालापानी, लिपुलेक र लिम्पियाधुराको विवाद रहेकाले अब निष्कर्ष निकाल्ने गरी भारतसँग वार्तामा बस्नुपर्नेमा जोड दिए । लिपुलेकका सम्बन्धमा भारतसँगै चीनसँग पनि वार्ता गर्नुपर्ने उनले बताए ।

भारतले नेपाली भूमि लिपुलेक हुँदै चीन स्वशासित तिब्बत जोड्ने सडक निर्माण गरेको छ । जसको नेपालले विरोध जनाइसकेको छ । कोइरालाले संसदबाट पारित संकल्प प्रस्तावसहित सुगौली सन्धिदेखि हालसम्मका सन्धि सम्झौताका साथै सबै किसिमका प्रमाणका साथ वार्तामा बस्नुपर्ने औंल्याए ।

प्रधानमन्त्री केपी शर्मा ओलीले नेपाली भूमिमा भारतले सडक बनाएको बारे थाहा छैन भन्नु आश्चर्यजनक भएको टिप्पणी गरे । नेपाली भूमिमा भारतले सडक बनाएको आफूलाई थाहा छैन भनेर प्रधानमन्त्रीले जग हँसाएको उनले आरोप लगाए ।