बीरगञ्ज, बैशाख ३०-नेपालमा अहिलेसम्मकै सबैभन्दा बढी कोरोना संक्रमित भेटिएको पर्सामा पुष्टि भएका सबै संक्रमित वीरगन्जका स्थानीय नै भएको अस्पतालले जनाएको छ ।

नारायणी उपक्षेत्रीय अस्पतालका वीरगन्जमा मेडिकल सुपरिटेन्डेन्ट डा. मदन उपाध्यायले वीरगन्जमा स्थानीयबाट संकलन गरिएको स्वाबमा परीक्षण गर्दा ३९ जना नयाँ संक्रमित भेटिएको बताए ।

वीरगञ्ज महानगरपालिकाका विभिन्न स्थानमा गत २ दिनमा ६ सय ८० जनाका स्वाब संकलन भएको थियो तीमध्ये ३९ जनामा कोभिड-१९ देखिएको हो । पर्सामा फिल्ड रिपोर्टिङमा क्रियाशिल पत्रकारलाई कोरोना संक्रमण भएको छ  । मङ्गलबार पर्सामा भएका ३९ जना कोरोना संक्रमितमध्ये पत्रकार पनि रहेको नारायणी अस्पतालका मेसु डाक्टर उपाध्यायले बताए ।

३९ जनामध्ये ४ जना पत्रकार पनि रहेको डाक्टर उपाध्यायले बताए । फेला परेका ४ जनामध्ये २ जना वीरगञ्जका नाम चलेकै पत्रकार रहेका छन् । ‘केहीलाई सम्भावनाका आधारमा जाँच गरिएको हो, केही पहिले संक्रमितको सम्पर्कमा पुगेका र केहीले स्वस्फूर्त रूपमा स्वाब परीक्षण गराउनु भएको थियो’ मेसु उपाध्यायले भने ।

वीरगन्ज नगरपालिका १, २, ३ र १६ नम्बर बडाबाट स्वाब संकलन गरिएको थियो । ‘संक्रमण समुदाय स्तरमै पुगेको देखिन्छ । संक्रमितहरूलाई उपचारको व्यवस्थापनको विषयमा छलफल चलिरहेको छ,’ उपाध्यायले भने, ‘अब चुनौती थपिएको छ ।’

वीरगञ्ज र त्यस आसपासको क्षेत्रमा परीक्षणलाई अझै व्यापक बनाउनु पर्ने आवश्यकता रहेको जानकारहरू बताउँछन । यसअघि वीरगन्ज महानगरपालिका ३ छपकैयाका एकै परिवारका १७ जना कोरोना पोजेटिभ भेटिएपछि बस्ती सिल गरी कन्ट्याक्ट ट्रेसिङ सुरुगरिएको थियो । यस वस्तीबाट गरिएको स्वाब परीक्षणको परिणाम आउँदा ३९ जनामा संक्रमण पुष्टि भएको हो ।

पर्सामा अहिलेसम्म ६४ जना संक्रमित भेटिएका छन् । तीमध्ये ३ जना निको भएकामा २ जनाको स्वास्थ्यमा समस्या देखिएपछि पुनः अस्पताल भर्ना गरिएको छ ।