बुटवल, २९ वैशाख-परीक्षणको दायरा बढाएसँगै प्रदेश ५ मा काेराेना संक्रमितको संख्या थपिँदै गएका छन् । ७ वटा प्रदेशमा १ सय ३४ संक्रमित मध्ये प्रदेश-५ मा मात्रै ५३ जनामा कोरोना संक्रमण पुष्टि भएको छ ।

यो प्रदेशका १२ जिल्लामध्ये हालसम्म रुपन्देहीमा ७ कपिलवस्तुमा २१, बाँकेमा २४ र बर्दियामा १ जना गरी ५३ जनामा कोरोना संक्रमण पुष्टि भएको हो ।

त्यस्तै, प्रदेश १ मा ३५, प्रदेश २ मा ३२, बाग्मतीमा ७ र सुदूरपश्चिम प्रदेशमा २ जनामा कोरोना संक्रमण भइसकेको छ । कपिलवस्तुमा आज मात्र १६ जनामा कोरोना संक्रमण देखिएको छ । त्यस्तै आज नै बर्दियामा पहिलोपटक १ जनामा कोरोना संक्रमण पुष्टि भएको छ ।

सोमबार थप भएका संक्रमितहरू कपिलवस्तुको यशोधराका-८ र बुद्धभूमि नगरपालिका-७ निवासी १५, १९, २३, ३०, ३२ र ३८ वर्षीय पुरूष रहेका छन् ।

त्यस्तै बर्दिया राजापुर गाउपालिका-५ की ११ वर्षीया युवतीमा कोरोना भेटिएको हो । त्यस्तै रुपन्देहीमा यसअघि १ जनामा संक्रमित देखिएकामा सोमबार ६ जना थपिएको हो ।

रुपन्देहीमा नयाँ संक्रमित थपिनेमा सम्मरीमाई गाउँपालिका ७ र लुम्बिनी साँस्कृतिक गाउँपालिका ६ निवासी २४, २६, २७, ३०, ३२ र ४० वर्षीय पुरूष रहेका छन् ।