जनकपुर, २९ वैशाख-सप्तरीमा १ जना १८ वर्षीय युवा कोरोना भाइरस संक्रमित भेटिएसँगै प्रदेश २ मा कोरोना संक्रमित हुनेहरूको संख्या ३२ पुगेको छ । जिल्लाको डाक्नेश्वरी गाउँपालिका ३ का १८ वर्षीय युवाको प्रयोगशाला परीक्षण रिपोर्ट आज पोजेटिभ आएको हो । कोरोना संक्रमित युवा चितवनमा राज मिस्त्रीको काम गर्दै आएको थिए । लकडाउन भएपछि काम रोकियो ।

२६ वैशाखमा उनको स्वाब संकलन गरी परीक्षणका लागि वीपी कोइराला स्वास्थ्य विज्ञान प्रतिष्ठान, धरान पठाइएको थियो । जिल्ला स्वास्थ्य प्रमुख दुनीयालाल यादवले भने, ‘१८ वर्षीय युवामा कोभिड–१९ पोजेटिभ पुष्टि भएको छ ।’

उनीसहित १३ जना ९ वैशाखमा चितवनबाट गाउँ फर्केका थिए । ‘१३ जनालाई डाक्नेश्वरी गाउँकै क्वारेन्टाइनमा राखिएको थियो’, यादवले भने, ‘ उनीसँगै आएका बाँकीको रिपोर्ट आएको छैन ।’