एजेन्सी, बैशाख २८-कोरोना भाइरस (कोभिड–१९) को संक्रमणबाट मृत्यु हुनेमध्ये आधाभन्दा बढी संख्या ३ वटा देशमा छ । अमेरिका, बेलायत र इटालीमा मात्रै विश्वमा मृत्यु भएका मध्ये आधाभन्दा बढीको मृत्यु भएको हो ।

कोरोना भाइरसका कारण सबैभन्दा बढी अमेरिकी नागरिकले ज्यान गुमाएका छन् भने युरोपकाे बेलायतमा सबैभन्दा बढीको मृत्यु भएको छ । यस्तै, युरोपेली राष्ट्रमध्ये इटfलीमा सबैभन्दा बढीले ज्यान गुमाएका छन् ।

आइतबारसम्म अमेरिकामा १३ लाख ४७ हजार ३१९ जना संक्रमित भइसकेका छन् भने ८० हजार ४० जनाको मृत्यु भइसकेको छ । यस्तै बेलायतमा ३१ हजार ५८७ जनाको मृत्यु भएको छ भने इटलीमा ३० हजार ३९५ जनाको मृत्यु भएको छ । यी तीन देशमा विश्वमा मृत्यु हुनेमध्ये आधाभन्दा बढी संख्या रहेको छ ।

कोरोना भाइरसका कारण विश्वभर आइतबारसम्म २ लाख ८० हजार ६८९ जनाको मृत्यु भएको छ । जसमध्ये अमेरिका, बेलायत र इटालीमा मात्रै १ लाख ४२ हजार २२ जनाको मृत्यु भइसकेको छ । बाँकी विश्वभर कोरोना भाइरसका कारण १ लाख ३८ हजार ६६७ जनाको मृत्यु भएको छ ।

आइतबारसम्म विश्वभर १४ लाख ४६ हजार ५५९ जना निको भएर घर फर्किएका छन् । युरोपेली संघमा आवद्ध देशमध्ये इटाली सबैभन्दा बढी प्रभावित देश हो । शनिबार इटालीमा थप १९४ जनाको मृत्यु भएको छ ।

केही दिनअघि इटलीलाई उछिन्दै बेलायत युरोपमा सबैभन्दा बढी मृत्यु हुने देश बनेको थियो । बुधबार बेलायतमा कोरोना भाइरसबाट मृत्यु हुनेको संख्या ३० हजार नाघेको थियो ।

युरोपका अति प्रभावित देशमध्ये स्पेन तेस्रो स्थानमा छ । स्पेनमा कोरोना भाइरसबाट २६ हजार ४७८ जनाको मृत्यु भइसकेको छ । फेब्रुअरीमा देशका उत्तरी क्षेत्रमा रहेको लोम्बार्डीमा कोरोना भाइरस संक्रमणका घटनाहरू देखिन थालेपछि लकडाउन लागू गर्ने इटाली युरोपको पहिलो मुलुक बनेको थियो । अहिले लकडाउनका केही उपायहरू हटाइएका छन् ।

यो साता सामाजिक दूरी कायम राख्दै र मास्क लगाउँदै पहिलो पटक कैयौं हप्तापछि त्यहाँका नागरिकले शारीरिक व्यायाम गर्न पाएका छन् । उनीहरूले आफन्तलाई समेत भेटेका छन् ।

क्याथोलिक गिर्जाघरहरूले पनि १८ मे तारखिमा सामूहिक प्रार्थना सुरू गर्ने तयारी गरिरहेका छन् । तर सामाजिक दूरीसम्बन्धी कडा नियमहरू पालना गर्नुपर्नेछ भने मास्क अनिवार्य रूपमा लगाउनुपर्नेछ ।

यद्यपि विद्यालय सिनेमाघर र अधिकांश पसलहरू बन्द रहनेछन् र सार्वजनिक रूपमा भेला हुने खालका सबै कार्यक्रममा प्रतिबन्ध कायमै छ । केही प्रतिबन्धहरू कायम रहे पनि मानिसहरूले सामाजिक दूरीलाई बेवास्ता गरेको र मास्क नलगाएका तस्वीरहरू सामाजिक सञ्जालमा पोस्ट भएका छन् ।