एजेन्सी, बैशाख २७-अन्तर्राष्ट्रिय मुद्रा कोष (आईएमएफ) ले वैश्विक अर्थव्यवस्थामा आउने गिरावटबारे यसअघि गरिएको अनुमान अझै कम हुने संकेत दिएको छ । आईएमएफले चीन र अमेरिकालाई पुनः व्यापारिक युद्धमा नअल्झन चेतावनी दिँदै यसबाट कोरोना भाइरस (कोभिड–१९) को महामारीबाट अर्थतन्त्रलाई बचाउने कोशिस कमजोर हुने चेतावनी दिएको छ ।

आईएमएफकी प्रबन्ध निर्देशक क्रिस्टालिना जर्जिवाले युरोपियन युनिभरसिटीको एक अनलाईन कार्यक्रमलाई सम्बोधन गर्दै उनले सो कुरा बताएकी हुन् । उनले २०२० मा वैश्विक अर्थव्यस्थामा ३ प्रतिशत गिरावट आउने बताइएपनि केही देशको आर्थिक तथ्यांक यो भन्दा धेरै कम देखिएको बताएकी छन् ।

उनले भनिन्, ‘कुनै तत्काल मेडिकल उपचार उपलब्ध नभएका कारण केही अर्थव्यवस्थालाई कोरोना भाइरस नियन्त्रणमा समस्या आउन सक्छ । कोरोना भाइरसका बारेमा अहिले नै केही भन्न सकिदैन त्यसकारण आर्थिक पूर्वानुमानमा पनि असर परिरहेको छ ।

कोभिड–१९ को नियन्त्रणको तरिकालाई लिएर अमेरिकी राष्ट्रपति डोनाल्ड ट्रम्पले चीनमाथि थप करवृद्धि गर्ने धम्की दिएलगत्तै आईएमएफको यो भनाई बाहिर आएको हो ।

ट्रम्पले शुक्रबारमात्रै ट्रम्पले चीनसँगको पहिलो चरणको व्यापारिक सम्झौता अन्त्य गर्न सक्ने बताएका थिए । शुक्रबार नै क्रिस्टालिना जर्जिवाले नाजुक अवस्थामा संरक्षणवादको नीति अपनाएमा वैश्विक सुधारको सम्भावनामा झट्का लाग्ने बताइन् ।

यसअघि अन्तर्राष्ट्रिय मुद्रा कोषले संसारभरको अर्थव्यवस्थामा तीन प्रतिशतसम्म गिरावट आउनसक्ने अनुमान गरेको थियो । आईएमएफले यसलाई १९३० को महामन्दीपछिको सबैभन्दा ठूलो वैश्विक आर्थिक गिरावट आउने बताएको छ ।

उसले कोरोना भाइरसको महामारीले संसारलाई नै ऐतिहासिक संकटमा पारेको उल्लेख गरेको छ । लामो समयसम्म कायम रहेमा त्यसलाई सम्हान विश्वका सरकार र बैंकको क्षमताको वास्तविक परीक्षा हुने जनाएको छ ।