बुटवल, २७ वैशाख-आज कोरोना भाइरस संक्रमण पुष्टि भएका कपिलवस्तुका तिनै जना यसअघि संक्रमित भएकाहरूसँगै १ साताअघि भारतबाट आएको खुलेको छ ।

कपिलवस्तुका प्रमुख जिल्ला अधिकारी दिर्घनारायण पौडेलले यसअघि कोरोना संक्रमण देखिएका मायादेवी गाउँपालिकाका युवासँगै उनीहरू पनि भारतको मुम्बईबाट नेपाल आएको बताए ।

आज थपिएका ३ मध्ये २ जना मायादेवीका र १ किशाेर शुद्धोधन गाउँपालिकाका हुन् । उनीहरूमध्ये १ जना १७ र २ जना १८ बर्ष उमेरका रहेका छन् ।

सीमा क्षेत्रबाट लुकिछिपी गाउँ पसेका उनीहरूलाई स्थानीयले थाहा पाएपछि गाउँपालिका–१ पकडीस्थित छत्रपाली तीर्थादेवी माविको क्वारेन्टाइनमा राखिएको थियो ।

उनीहरू २३ वैशाख राती मायादेवी गाउँपालिका–८ हरिवंशापुर र चकारचौडाकोबीच खेतकाे बाटो हुँदै नेपाल प्रवेश गरेका थिए । प्रमुख जिल्ला अधिकारी पौडेलले क्वारेन्टाइनमा रहेका ६५ जना सबैको स्वाब परिक्षण गर्न पठाइएकोमा ५ जनामा कोरोना संक्रमण पोजिटिभ देखिएको बताए।

संक्रमित व्यक्ति सबै मायादेवी गाउँपालिकाका रहेका छन् । संक्रमित तिनै जनालाई बुटवलस्थित कोरोना विशेष आइसोलेसन अस्पतालमा ल्याउने तयारी भइरहेको प्रजिअ पौडेलले जानकारी दिए ।

बुटवल आइसोलेसन अस्पतालमा यसअघि नै कपिलवस्तुका २ र रुपन्देहीका १ गरि ३ जना संक्रमित रहेका छन् । अब प्रदेश-५ मा कोरोना संक्रमितको संख्या ३० पुगेको छ । बाँकेको नेपालगञ्जमा यसअघि २४ जना संक्रमित भेटिएका थिए ।