काठमाडौं, २५ वैशाख-कोरोना भाइरस (कोभिड १९) रोकथामको अग्रभागमा खटिएकाहरुको हौसलाका लागि स्वास्थ्य सेवा विभागले दीप प्रज्वलन गरेको छ ।
बिहीबार साँझ बुद्ध जयन्तीको अवसरमा विभागका महानिर्देशक महेन्द्र श्रेष्ठको उपस्थितिमा स्वास्थ्यकर्मी, सुरक्षाकर्मीको हौसलाका लागि दीप प्रज्वलन गरिएको हो ।

कार्यक्रममा विभागका महानिर्देशक श्रेष्ठले स्वास्थ्यकर्मीको हौसलाका लागि दीप प्रज्वलन गरीएको र आफूहरु निरन्तरण कोभिड १९ रोकथाममा खटिएको बताए ।

‘आज बुद्ध जयन्ती पनि हो । अहिले स्वास्थ्यकर्मीहरु कोरोना संक्रमितको उपचारका र रोकथाममा खटिनुभएको छ,’ उनले भने, ‘उहाँरुको हौसलाका लागि विभागले पनि दीप प्रज्वलन गरेको हो ।’

सो अवसरमा व्यवस्थापन महाशाखाका निर्देशक भोगेन्द्र डोटेल, राष्ट्रिय जनस्वास्थ्य प्रयोगशालाका निर्देशक डा. रुणा झा, सेवा महाशाखाका प्रमुख डा. तारानाथ पोख्रेल, स्वास्थ्य सेवा विभागका निरीक्षक मदनकुमार वली लगायतको उपस्थिति थियो ।