विराटनगर, बैशाख २५–कोशी अस्पताल कोभिड १९ उपचार केन्द्रमा उपचाररत थप ८ जना डिस्चार्ज हुने भएका छन् । डिस्चार्ज हुने ८ जनाको दुई पटक गरिएको स्वाव परीक्षणमा रिपोर्ट नेगेटिभ आएपछि डिस्चार्ज गर्न लागिएको हो । उनीहरुलाई भोली विहान १० वजे डिस्चार्ज गरिने छ ।

शुक्रबार डिस्चार्ज हुनेमा ७ जना नेपाली र १ भारतीय रहेको कोशी अस्पताल विराटनगरकी मेडिकल सुपरिटेण्डेन्ट डा. संगिता मिश्राले जानकारी दिइन् । उनका अनुसार ७ नेपाली डिस्चार्ज हुनेमध्ये २ जना विराटनगरका रहेका छन् । कोरोना उपचार केन्द्रमा भर्ना भएको १४ दिन अवधि पुगेका १५ जनाको पीसीआर परीक्षण गर्दा ८ जनाको रिपोर्ट नेगेटिभ र ७ जनाको पोजेटिभ आएको थियो । कोभिड अस्पतालबाट यसअघि बुधबार ६ जना डिस्चार्ज भएका थिए । बुधबार डिस्चार्ज हुने सवै भारतीय नागरिक रहेका थिए ।

६ जना डिस्चार्ज भएपछि उपचार केन्द्रमा २५ जना रहेका थिए । भोलि ८ जना डिस्चार्ज भएपछि १७ जना हुने छन् । उनीहरु सबैको स्वास्थ्य अवस्था सामान्य रहेको छ । प्रदेश नंं. १ मा बिहिबारसम्म कोरोना भाईरस कोभिड १९ का शंकास्पद १ हजार ७ सय ८९ जनाको स्वाव संकलन गरिएको छ ।

स्वाव संकलन गरिएका मध्ये ४ सय २२ महिला र १ हजार २ सय ९० पुरुष गरि १ हजार ७ सय १२ जनाको रिपोर्ट नेगेटिभ आएको छ । प्रदेश १ मा आरडिटी विधिबाट ६ हजार ८ सय ३१ जनाको परीक्षण गरिएको छ । आरडिटी परीक्षण गरिएका मध्ये १८ जनाको रिपोर्ट पोजेटिभ आएको छ ।

आरडिटी गरिएका १ हजार २ सय १२ महिला र ५ हजार ५ सय ६० पुरुष गरि ६ हजार ७ सय ७२ जनाको रिपोर्ट नेगेटिभ आएको मुख्यमन्त्री तथा मन्त्रिपरिषद्को कार्यालयले जनाएको छ । प्रदेश १ सरकारले वैशाख २५ गते सम्म ५ हजार ७ सय ९८ वेडको क्वारेन्टाईन निर्माण गरेको छ । मोरङको मिक्लाजुङमा नेपाली सेनाले यसअघि निर्माण गरेको २ सय वेडको क्वारेन्टाईन हटाईएको छ ।

हावाहुरीका कारण पाल उडाएपछि क्वारेन्टाईन हटाईएको बताईएको छ । प्रदेश १ मा क्वारेन्टाईनमा बस्नेको संख्या १ हजार ४ सय २ पुगेको छ । होमक्वारेन्टाईनमा ७ हजार ६ सय २९ जना रहेको मुख्यमन्त्री तथा मन्त्रिपरिषद्को कार्यालयले जनाएको छ ।