काठमाडौं, २५ वैशाख-शुक्रबारदेखि सुरु हुने संघीय संसदको बजेट अधिवेशनअघि प्रतिनिधिसभा, राष्ट्रियसभाका सांसद र कर्मचारीको कोरोना भाइरस परीक्षणका लागि स्वाबको नमुना संकलन गरिएको छ ।

आज संघीय संसदअन्तर्गत कूल ४४१ जनाको थ्रोट स्वाब संकलन गरिएको हो । जसमा १७९ जना प्रतिनिधिसभा सदस्य, राष्टियसभाका ३३ जना सदस्य र कर्मचारी र मर्यादापालक २२९ जना गरी जम्मा परिक्षण ४४१ जनाले परीक्षणका लागि स्वाबको नमुना दिएका छन् । बाँकी सांसद, सुरक्षाकर्मी र कर्मचारीको परीक्षण भोलि बिहान ८ बजेदेखि १० बजेसम्म बानेश्वरमै स्वाबको नमुना संकलन गरिने संसद सचिवालयले जनाएको छ ।

सांसदको कोरोना भाइरस संक्रमण भए–नभएको परीक्षण पीसीआर प्रविधिबाट हुने छ । त्यसका लागि बिहीबार (आज) बिहान १० बजेदेखि राष्ट्रियसभा सांसदको र ११ बजेदेखि प्रतिनिधिसभा सांसदको स्वाब संकलन गरिएको थियो । स्वाब संकलन संघीय संसद भवन परिसर बानेश्वरमा गरिएको छ ।

कार्यव्यवस्था परामर्श समितिले पनि संसद भवन छिर्नेहरू सबैको कोरोना भइरस परीक्षणसहित स्वास्थ्य परीक्षण गर्ने व्यवस्था गर्न स्वास्थ्य मन्त्रालयलाई आग्रह गरेको थियो । संसद बैठक स्थलमा पनि सांसदहरु बीचको दूरी कायम गरिने गरी व्यवस्था मिलाइएको छ भने संसद प्रवेश गर्नेहरूले अनिवार्य रुपमा मास्क लगाउनुपर्ने र ज्वरो जाँच गर्नुपर्ने व्यवस्था गरिएको छ ।