विराटनगर, बैशाख २४–नेकपा विराटनगर महानगरपालिका वडा नं. ११ शाखा कमिटीको आयोजनामा खुल्ला रक्तदान कार्यक्रम सम्पन्न भएको छ । विराटनगर–११ स्थित जनपथ माध्यमिक विद्यालयमा कार्यक्रम सम्पन्न भएको हो ।

रक्तदान जीवनदान भन्ने मुल नाराका साथ गरिएको रक्तदान कार्यक्रममा कुल ६७ जना रक्तदाताहरुबाट ६७ पिन्ट रगत संकलन भएको छ । लकडाउनका कारण विराटनगरको ब्लड बैंकमा रगतको अभाव भएपछि रक्तदान कार्यक्रमको आयोजना गरिएको नेकपा विराटनगर महानगर कमिटीका अध्यक्ष सागर थापाले बताए ।

त्यस्तै नेकपा ११ नं. वडा कमिटीकी अध्यक्ष ममता प्रधानले एक थोपा रगतको अभावमा ज्यान गुमाउन बाध्य भएका व्यक्तिहरुले पनि नयाँ जीवन पाउने धारणा व्यक्त गर्नुहुँदै सम्पूर्ण रक्तदाताहरुलाई धन्यवाद ज्ञापन गरिन् । नेपाल रेडक्रस सोसाइटी मोरङको प्राविधिक सहयोगमा आयोजित कार्यक्रममा बिशेष गरि युवा तथा प्रौढ उमेर समूहकाले बढी रक्तदान गरेका थिए ।