विराटनगर, बैशाख २१–कोशी अस्पताल कोभिड १९ उपचार केन्द्रका लागि नेपाल कम्युनिष्ट पार्टी(नेकपा) निकट युवक संगठन राष्ट्रिय युवा संघ नेपाल मोरङले नमूना संकलन वुथ हस्तान्तरण गरेको छ ।

कोराना भाइरसका शंकास्पद व्यक्तिको नमुना संकलन लिनका लागि सहयोग पु-याउने उद्देश्यका साथ नमूना संकलन वुथ हस्तान्तरण गरिएको राष्ट्रिय युवा संघ नेपालका केन्द्रिय सदस्य मुकेश बुढाथोकीले जानकारी दिए ।

कोभिड अस्पतालमा आन्तरिक मामिला तथा कानुन मन्त्री हिक्मत कार्की र सामाजिक विकास मन्त्री जीवन घिमिरेलाई वुथ हस्तान्तरण गरिएको थियो । मन्त्रीद्धयले संयुक्त रुपमा बुथ ग्रहण गरि कोशी अस्पताल विराटनगरकी मेडिकल सुपरिटेन्डेन्ट संगीता मिश्रालाई हस्तान्तरण गर्नुभएको थियो ।

युवा संघ मोरङले इन्जिनियरको प्राविधिक सहयोगमा करिव ८५ हजार रुपैयाँको लागतमा बुथ निर्माण गरेको अध्यक्ष नविन पौडेलले जानकारी दिए । उनका अनुसार राष्ट्रिय युवा संघले अहिले सम्म तीन वटा वुथ निर्माण गरेको छ । यसअघि सुन्दरहरैचा नगरपालिका र बेलबारी नगरपालिकालाई हस्तान्तरण गरिएको अध्यक्ष पौडेलले बताए ।