सुर्खेत, १९ वैशाख-१३१औँ अन्तराष्ट्रिय श्रमिक दिवसका अवसरमा कर्णाली प्रदेशका मुख्यमन्त्री महेन्द्रबहादुर शाहीले शुभकामना सन्देश दिँदै श्रमजीवि मजदुर वर्गका दैनिक जीविकोपार्जनसँग जोडिएका समस्या सामाधान गर्न आवश्यक कदम चाल्ने बताएका छन् ।

कोरोना भाइरसका कारणले लकडाउनमा परेका मजदुरलाई राहत प्याकेज उपलब्ध गराउन प्रदेश सरकारको तर्फबाट सबै स्थानीय तहमा आवश्यक बजेट पठाएका जाकारी दिएका हुन् ।

उनले शुभकामना सन्देशमा ‘लकडाउनका कारण बाटो र कार्यस्थलमा अलपत्र मजदुरको उद्धारमा पनि आवश्यक समन्वय भइरहेको छ’ भनेका छन्, ‘हाम्रा सामु अप्रत्यासित रूपमा देखिएको कोरोना भाइरस (कोभिड–१९)ले निम्त्याएको संकटले सिंगो विश्व समुदाय आक्रान्त बनेको छ ।’

मुख्यमन्त्री शाहीले ‘कोरोनाका कारण आम मानव समुदायले भोग्नुपरेको समस्याका अलावा मजदुर वर्गले दैनिक जीवीकोपार्जनसंग जोडिएका थप समस्या भोगिरहेको प्रति प्रदेश सरकार गम्भीर रहेको बताए ।

‘यो संकटको सामनाका लागि प्रदेश सरकार सम्पूर्ण साधनश्रोत तथा संयन्त्रको परिचालन सहित गम्भिरतापुर्वक लागिरहेकोले उच्च मनोवल सहित धैर्य गर्न समग्र प्रदेशवासी जनसमुदायलाई हार्दिक आग्रह गर्दछु’ उनले भनेका छन् ।