काठमाडौं, १९ वैशाख-सरकारले कोरोना भाइरसको परीक्षण बढाएको बताएको छ । शुक्रबार राष्ट्रियसभा विधायन व्यवस्था समिति बैठकमा स्वास्थ्य तथा जनसंख्या मन्त्री भानुभक्त ढकालले सरकारले कोरोना परिक्षण बढाएको बताएका हुन् । कोरोना परीक्षण कम भएको भन्दै सरकारको आलोचना भइ रहेको थियो ।

‘कोरोनाको पहिलो टेस्ट हङकङ पठाएर गरेका थियौं,’ मन्त्री ढकालले भने, ‘अहिले १६ ठाउँबाट परिक्षण गरिरहेका छौँ ।’ अहिलेसम्म ५७ जनामा कोरोना पुष्टि भएको बताउँदै उनले भाइरस नियन्त्रणमा सरकार सफल भएको दाबी गरे ।

‘महामारी परास्त गर्न लकडाउनको पालना गरेर जनताले सहयोग गरेका कारण सरकार सफल भएको हो,’ उनले भने, ‘नेपाल अब उच्च जोखिममा छैन।’

मन्त्री ढकालले आपूर्ति व्यवस्थापन, राहत वितरण, उधोग र कृषिमा व्यवस्थापन गरिने बताए । ‘स्वास्थ्यसम्बन्धी एकीकृत कानुन नहुँदा समस्या भएको छ,’ उनले भने,’ एकीकृत कानुन बनाउनु पर्ने अवस्था आएको छ ।’