समाजवादी पार्टी र राष्ट्रिय जनता पार्टी (राजपा) बीच एकीकरण भएपछि प्रदेश २ सरकारमा रहेका पात्र परिवर्तनको माग उठ्न थालेको छ । नेताका कोटाको आधारमा मुख्यमन्त्री र मन्त्रीहरू बनेकाले जनताको चाहनाविपरीत कार्य भइरहेकाले काम गर्ने सशक्त व्यक्तिलाई ल्याउनु पर्ने माग उठेको हो ।

राजपामा केन्द्रीय सदस्य रहिसकेका रामजी रायले मन्त्रिपरिषद् परिवर्तनको अति आवश्यक्ता रहेको बताए । प्रदेश २ सरकारलाई यथास्थितिमा राखियो भने पार्टीलाई ठूलो क्षति पुग्ने पनि उनको भनाइ । कोटामा मन्त्री बनेकासँग धेरै अपेक्षा गर्न नसकिने नेता रायले बताए ।

अर्का नेता सदाशिव मिश्रले प्रदेशमा उपलब्धिमूलक काम नगरेको र कोरोना महामारीको बेला पनि प्रदेशमा सरकार नरहेको जस्तो महशुस भइरहेको आरोप लगाए । तर, केन्द्रीय कमिटीको निमार्णपछि यस्ता कुरा बहसमा ल्याउनु पर्ने उनको सुझाव रहेको छ ।

कोरोना संकट आएपछि मुख्यमन्त्रीदेखि मन्त्रीहरू दैनिकजसो नयाँ नयाँ योजना घोषणा गरिरहेका छन्, तर कार्यान्वयनको सवालमा प्रदेश सरकारको निकै आलोचना भइरहेको छ । कोरोनाभन्दा अघि उपभोक्ता समितिको भुक्तानीलाई लिएर महिनौँ संसद अवरुद्ध रहेको थियो भने विकासको कुनै कार्य अगाडि बढन सकेको छैन ।