किशोरलाई बिहीबार राति उपचारका लागि वीरगञ्जस्थित नारायणी उपक्षेत्रीय अस्पतालको आइसोलेसनमा पठाइएको सर्लाहीका प्रमुख जिल्ला अधिकारी मोहनबहादुर जिसीले जानकारी दिए ।

किशोरको परिवारका ५ सदस्यलाई धनकौल गाउँपालिकाको क्वारेन्टाइनमा राखिएको प्रजिअ जिसीले बताए । किशोर बुधबार साँझ क्वारेन्टाइनबाट आफ्नो घर गए पनि उनी आफ्नो परिवारका सदस्य बाहेक कसैको सम्पर्कमा नगएको उनले जानकारी गराए । गाउँपालिकामा अहिले सुरक्षा व्यवस्था कडा पारिएको प्रजिअ जिसीले बताए ।

गत शुक्रबार वैशाख ५ गते आरडिटी रिपोर्ट पोजिटिभ देखिएपछि किशोरलाई जनकपुरधामस्थित प्रादेशिक अस्पतालमा पीसीआर जाँचका लागि लगिएको थियो । त्यहाँ किशोरमा कोरोना सङ्क्रमण नदेखिएपछि वैशाख ७ गते धनकौलको क्वारेन्टाइनमा पठाइएको थियो ।

ती किशोरलाई जनकपुरबाट धनकौल पठाएको चार दिनपछि बिहीबार पुनः कोरोना रहेको भन्दै रिपोर्ट आएको हो ।टेकुमा गरिएको परीक्षणमा किशोरमा कोरोना सङ्क्रमण पुष्टि भएको बिहीबार सार्वजनिक गरिएको छ ।

लकडाउनको बेला ती किशोर गत चैत २३ गते भारतको राजधानी नयाँदिल्लीबाट रौतहटको गौर हुँदै धनकौल फर्केका थिए ।सङ्क्रमित किशोर नयाँदिल्लीस्थित एक ब्याग फ्याक्ट्रीमा काम गर्दै आएका थिए । भारतबाट १ किशोर आएको सूचना पाएलगत्तै प्रहरीले हरकठवास्थित क्वारेन्टाइनमा लगेर उनलाई राखेको थियो ।

थप १ जनामा पोजेटिभ

ईश्वरपुर नगरपालिकामा बिहीबार आरडीटी गर्दा १ व्यक्तिमा पोजिटिभ नतिजा आएको छ ।ईश्वरपुर–९ रामनगर निवासी ५८ वर्षीय १ पुरुषलाई आरडीटी विधिवाट कोरोनाको परीक्षण गर्दा रिपोर्ट पोजिटिभ आएको सर्लाहीका प्रजिअ जिसीले जानकारी दिए ।

ती पुरुषको स्वाब पीसीआर विधिबाट परीक्षण गर्न प्रादेशिक अस्पताल जनकपुरमा पठाइएको छ । धेरैजसो आरडीटी पोजिटिभ देखिएको ‘केस’ मा पनि पीसीआर परीक्षण गर्दा नेगेटिभ नतिजा आउने भएका कारण आरडीटी प्रभावकारी नरहेको देखिएको छ । रासस